pb 22 r
le gentil chevalier monsigneur Guillaume de Douglas. Et li dist devant tous les aultres : "Monsigneur
Guillaume, chiers amis, vous savés que j’ai eut moult affaire et a souffrir en mon tans
que j’ai vescu pour maintenir les drois de cesti roiaulme. Et quant jou euch le plus
affaire, je fis I veu que je n’ay point acomplit, dont moult me poise. Je voay que,
s’il estoit ensi que je peuisse tant faire que jou euisse ma guerre achievee, par
quoy je peuisse cesti royaulme gouvrener en pais, jou yroie aidier a guerrier lez
ennemis Nostre Signeur et les contraires de le foy crestienne a mon loial pooir.
A che point a toudis mon cuer tendut, mais Nostres Sires ne l’a mie volu consen
tir. Si m’a donné tant a faire a men tamps, et a darrains si entrepris si grefment
de si grant maladie qu’il me convient morir, si com vous veés. Et puisqu’il est
ensi que li corps de mi n’i puet aller, ne achiever chou que li cuers a tant desiret,
jou y voel envoiier le cuer ou lieu del corps pour mon veu achiever. Et pour che
que je ne sçay en tout mon royalme nul chevalier plus preu de vostre corpz ne mielx
tailliet pour mon veu acomplir en lieu de mi, je vous pri, tres chiers et tres
especiauls amis, tant comme je puis, que vous cest voyage voelliés entreprendre
pour l’amour de mi et me ame acquiter enviers Nostre Signeur. Car je tieng tant
de vostre noblece et de vostre loialté que, se vous l’entreprendés, vous n’en fauriéz
nullement; et si en morray plus aise, mais que ce soit par tel maniere que je
vous diray. Je voel, sitost que je seray trespassés, que vous prendés le cuer de
mon corps et le faites bien embasmer, et prendés tant de mon tresor qu’il vous
samblera que assés en aiiés pour parfurnir tout le voiage pour vous et pour
tous chiaus que vous vorrés enmener avoequez vous; et enportés mon cuer a
voecques vous pour presenter au Saint Sepulcre, la ou Nostres Sires fu ensevelis,
puisque li corps n’i puet aller. Et le faites si grandement et vous pourvés si sou
ffissanment de tele compagnie et de toutes aultres coses qu’a vostre estat apertient.
Et que partout la ou vous venrés, que on sache que vous enportés oultre mer comme
messagiers avoeques vous le cuer le roy Robert d’Escoce. Et a son commandement,
puisqu’ensi est que le corps de lui n’i puet aler." Tout chil qui la estoient commechie
rent a plorer de pité moult tenrement. Et quant li dis messires Guillaumes peut parler, il res
pondi et dist : "Gentils sires, C mille merchis de le grande honneur que vous me fet
tes, quant vous si noble et si grant coze et tel tresor me cargiés et recommandés. Et je
feray volentiers et de cler cuer vostre commandement a mon loial pooir, jamais n’en
doubtés, comment que je ne sui mies dignes ne si souffissans pour tel cose achiever."
"Ha ! gentils chevaliers", dist adont li rois, "grans merchis, mes que vous le me creantés."
"Certes, sires, moult volentiers", dist li chevaliers. Lors li creanta tantos, comme loyaus chevaliers.
Adont dist li rois : "Or soit Diex graciiés. Car je morray plus a pais d’ore en avant, pb 22 v