pb 148 v
enssi que pour entrer en bataille. Car bien savoient li signeur que point dou
jour n’isteroient sans estre combatu, pour les apparans que leur fourageur, le
merquedy, leur avoient rapporté, des Flamens que il avoient veus, qui les
aprochoient et qui le bataille demandoient. Ly rois de France oÿ a che matin
messe, et ossi fissent pluiseur signeur, qui tout se missent en priiere et en devocion
envers Dieu, que ilz lez vosist jeter dou jour a honneur, celle matinee leva
une brume tresgrande et tres espesse et si continuelle que a painez veoit
on un arpent lonch, dont li signeur estoient courouchié, mais amender
ne le pooient. Aprés la messe dou roy, ou ly connestablez et pluiseur haut signeur
furent pour parler ensamble et avoir avis quel cose on feroit, ordonné fu
que messires Oliviers de Cliçon, connestablez de France, messires Jehans de Viane, a
miraulx de France, et messires Guillaumes de Poitiers, bastars de Lengrez, chil
troy vaillant chevalier et usé d’armez, yroient pour descouvrir et aviser de
priéz les Flamens, et en raporteroient au roy et a ses onclez la verité.
Et entruéz li sirez de Couchi, ly sirez de Labreth et messires Huez de Chaalon
entenderoient a ordonner lez bataillez. Dont se departirent dou roy ly troy
dessus nommet, montéz sus fleurs de coursiers. Et chevauchierent sus
frain a cel endroit ou il penssoient que il les trouveroient, et la nuit
logiet il estoient. Vous devéz savoir que le joedy au matin, quant
ceste forte bruine fu levee, li Flamenc, qui estoient trait, des devant le
jour, en che fort lieu, si com chi dessus est dit, et il se furent la tenu
jusquez environ VIII heurez, et il veirent que il n’ooient nullez nouvellez
des François. Et il se trouverent une si grosse bataille ensamble, orgieux
et oultrequidance lez resvilla, et commenchierent les capitainez a parler l’un
a l’autre, et pluiseurs de eulx ossi, en dissant : "Quel cose faisons nous chy,
estans sus nos piéz et nous refroidant? Que n’alons nous de bon corage,
puisque nous en avons la volenté, requerre nos ennemis et combatre? Nous
sejournons chy pour noient, jamais ly François ne nous venroient chy
querre. Alons a tout le mains jusquez sus le Mont d’Or, et prendons l’a
vantage de la montaigne." Chez parollez mulletepliierent tant que
tout s’acorderent a passer oultre et venir jusquez sus le Mont d’Or,
qui estoit entre eux et lez François. Adont pour eschieuer le fosset
qui estoit pardevant eux, tournerent ilz autour dou bosquetiel, et
prissent l’avantage des camps. A ce que il se traissent ensi sus les
plains et au tourner che bosquetiel, ly III chevalier dessus nommet vinrent
sy a point que tout et par grant loisir les aviserent, et chevauchierent pb 149 r