Online Froissart
Home  |  Navigate  |  Apparatus  |  Search  |  About the Edition  |  About the Project  |  Help
Facsimile mode    Settings    Browse  |  Collate      
Navigate | Close
Preferences
Leiden VGGF 9 (vol. 2)
Previous | Folio 18 v | Next
pb 18 v
en sa grace que nous ne soions, enssi comme il appert par les fosseurs, luy
estant a Brugez, qui sont veu pour brissier nostre hiretage et tollir
nostre riviere dont la bonne ville de Gaind seroit deffaite et perdue, et
que il voelt faire, si comme renommee queurt, un castiel a Donse
a l’encontre de nous pour nous tenir en dangier et en foiblece, et
que cil de Brugez ly proumettent et ont proumis dou tamps passé,
chela savons nous tout clerement, que, se il avoient l’aissement et
le cours de la riviere dou Lis, il li donroient par an X ou XII mille
firins, je dy et conseille que la bonne ville de Gaind envoie deviers
ly sagez hommez bien avisséz et endotrinéz de parleure, qui ly remon
strent hardiement et par avis toutez ces cosez, tant dou bourgois de
Gaind qui est en sa prison a Erclo que sez baillieus ne voelt rendre,
que autrez coses avenuez dont la bonne ville de Gaind ne se contente
miez bien, et incidenssez qui tous lez jours a venir pueent toutez
enclosez ens, par quoy il ne pensse mies ne ses consaulx que nous
soions si mort que, se besoings est, nous ne nos puissons et
volons resister. Et, ses responsez oies, la bonne ville de Gaind ara
avis de punir le meffait sus ceulz qui seront trouvé couppable
envers ly." Quant Jehan Lion eut remonstré ceste parolle en le place
que on dist ou marchiet des devenres, cascuns dist: "Il dist, il dist
bien !" Adonc se retraïst cascuns en sa maison. A ces parollez que Jehans
Lyons avoit remonstreez, Aghisebrest Mahieu n’avoit point esté, car
ja doubtoit il lez Blans Capperons, mais Estievenins, sez freres, y fu,
qui toudis sortissoit leur tamps a venir. Sy dist, quant il fu re
venus: "Je le vous disoie bien et ai toudis dit, par Dieu, Jehan Lion
nous destruira tous. A mal heure fu, quant vous ne m’en laiastez
convenir, car, se je l’euisse occis, j’en fuisse trop legierement venus
jus . Or n’est il pas en no poissance que nous le puissons ne osons
occire, il est plus fors en le ville que ly contez n’i soit." Ghisebrest
respondy et dist: "Tés toy, soteriaux. Quant je vorray bien a certez,
avoecquez le poissance de monsigneur, tout cil Blanc Cappron seront
ruet jus, et tés lez porte maintenant, qui temprement n’ara
que faire de cappron."
SHF 2-107 sync Or furent ordonné et cargiet et enditté pour aller en mesage
deviers le conte aucun sage et notable homme de la ville de Gaind. pb 19 r