pb 194 v
rescouse, et quant François Acremen et cil Gantois perchurent l’afaire que il avoient
falli a leur entente, si se retraissent tout bellement et requellierent leurs gens,
et se departirent de Ardembourc, et s’en ralerent ens es IIII Mestiers, et furent
chil de la garnison d’Ardembourc plus songneus de garder leur ville et
d’ordonner leurs gais que il n’euissent esté, et honnourerent grandement
entre eux lez trois dessus dis. Car, se il n’euissent esté, Ardembourc estoit
perdue, et il avoient tout lez geullez coppeez.
SHF 2-445 sync Vous avéz bien chi dessus oy recorder comment ly dus d’Ango qui se disoit
rois de Napplez, de Sesille et de Jherusalem, fist le terme de trois ans guerre
en Puille et en Calabre et a Naplez a messire Charle de la Pais, et comment, celle
guerre faissant, il morut, ossi fist messires Charlez de la Pais, et voellent ly
aucun dire que il fu mourdris ou roiaulme de Honguerie, par le consentement
de la roine. Car, aprés la mort dou roy de Honguerie, pour tant que il avoit
esté filz de son frere, il voloit maintenir que ly roiaulmez devoit retourner.
Car de son oncle, le roy Loeis de Honguerie, n’estoient demoret que fillez, si s’en
doubta la roine que il ne vosist deshireter ses fillez, si fist ochire messire Charle,
de la quelle mort il fu grant nouvelle partout, et en fu embellie la guerre
la roine de Naplez et de son fil, le jone roy Loïs, qui se tenoient en Avignon
et faissoient guerre a Prouvence. Le roy de Honguerie vivant, ly hault baron
et ly prelat de Honguerie avoient jetté leur avis que l’ainnee de leurs
fillez, madame Marguerite, qui estoit belle damoisselle et hiretiere de
grant roiaulme, on le donroit a Loïs de France, conte de Valois, fil et frere
de roy de France, pour la cause de ce que il leur sambloit que il demoroit
entre eux en Honguerie, et aroient le roi Loïs recouvré. Quant ly rois
de Honguerie fu mors, on envoia grans mesagez en France devers le roy
et sez onclez, en monstrant que la roine de Honguerie pour sa fille l’ainsnee
voloit avoir Loïs, le conte de Valois. Ceste requeste sambla au roy et a sez onclez
et as barons de France moult haute et moult noble, exepté une cose, que ly
contez de Valois eslongoit trop sa nacion et le noble roiaulme de France.
Nequedent, tout consideré, on ne pooit veoir que ce ne fust tres haulte
cose et grans pourfis pour le conte de Vallois de estre rois de Honguerie,
qui est ly uns des grans roiaulmez crestiiens dou monde. Sy furent ly Hon
griien, qui la estoient envoiiet depar le roine et le païs, grandement bien requ
eiliet, et leur furent donné biaux dons et grans presens, et avoecq eux
en Hongueriie s’en alerent ambasadour de France, ly evesquez de Masseres
et messires Jehans la Personne, ly quelz, par procuracion generaulx, quant il fu pb 195 r