pb 208 r
seront ja depar nous refusé. Car voirement toutez les parollez que vous avéz ditez et missez
avant, avons nous ditez." "Depar Dieu !" dist ly amiraulx, "et je le voel." Depuis ne demora
gairez de jours que ly contez de Douglas et ly autre baron d’Escoce menerent
l’amiral de France sus une forte montaigne en leur païs, ou desoulx avoit I pas
par ou il convenoit passer les Engléz, cariagez et toute l’ost. De celle montaigne ou
ly amiraulx estoit, et grant fuisson de chevalerie de France en sa compaignie, veirent il
tout clerement le poissance des Englés. Sy les aviserent au plus justement comme il
peurent, et les nombrerent a VI mille hommez d’armez et bien, que archiers que
gros varléz, LX mille. Sy dissent en eux meismez, tout consideret, que il n’estoient
pas gens asséz pour eux combatre. Car des Escos il ne trouvoient point mille
lancez et otant de leur costé, et environ XXX mille hommez d’autrez gens et moult mal
arméz. Sy dist ly amiraulx au conte de Douglas et au conte de Mouret: "Vous avéz aséz
raison de non voloir combatre ces Englés, mais avissés vous que vous vorés
faire. Il sont bien si fort que pour chevauchier parmy vostre paÿs et dou tout destruire,
et, puisque combatre ne les poons, je vous pri que vous me menéz parmy vostre paÿs
et par cemins non hantéz en Engletere. Si leur ferons guerre a l’autre part, ensy
comme il le nous font ychi, se il est enssy que ce se puist faire." "Oil, sire," ce respon
dirent ly baron d’Escoce.
SHF 2-478 sync Messires Jehans de Viane et ly baron d’Escoce orent la conseil ensamble, que il guer
priroient leur paÿs et lairoient les Englés convenir, et chevaucheroient oultre
et enteroient en Gallez et yroient devant la cité de Karlion, et trouveroient la asséz
de bon païs ou il se contrevengeroient. Chils consaulx et avis, par l’acord de tous, fu
arestéz entre eux. Si se retraissent toutez gens d’armes a l’oposite des Englés, et prisent
lez foréz et les montaignez, et enssy comme il chevauchoient parmy Escoce, eux meismez
destruissoient leur païs et ardoient villagez et manoirs, et faissoient hommez, femmez
et enfans et pourveancez retraire ens es forés d’Escoce. Car bien savoient que ly
Englés ne les yroient jamais la querir. Et passerent tout au travers de leur païs,
et s’en ala ly rois, pour tant que il n’estoit pas en boin point pour chevauchier
en la Sauvage Escoce, et la se tint toute leur guerre durant, et laissa ses gens
convenir, sy passerent ly François et ly Escot les montaignez qui sont a l’encontre
dou païs de Northombrelande et d’Escoce, et entrerent en la terre de Gallez, et com
menchierent a ardoir païs et villez, et a faire moult de desrois en la terre
de Moutbray, qui est au conte de Notinghem, et en la conté de Stafort et en la terre
dou baron de Grisop et dou signeur de Mousegrave, et prisent leur chemin pour
venir devant la cité de Karlion.
SHF 2-479 sync Entrué que ly amiraulx de France et cil qui en sa compaignie estoient, ly R.pb 208 v