pb 217 v
de nostre dit signeur et de nous, et par leurs lectres et mesagiers solempnéz en grans
nombrez que il ont envoiiéz devers nous et lez gens de nostre dit signeur
estans a Tournay, ont renonchié de nostre dit signeur et nous des gracez pardons
dessus dis, et sont retourné de bon coer a la vraie obeissance de nostre dit
signeur et de nous, en prometant que d’orez en avant il seront bons et loiaux
et vrais subgéz a nostre dit signeur le roy, comme leur signeur souverain, et de
nous, comme leur signeur naturel, a cause de Marguerite nostre compaigne,
et de nous, Marguerite, comme leur dame naturel et hiretiere, pourquoy nostre
dit signeur et nous nos dis subgéz de Gand et leurs complissez avons receu
en nostre garde, misericorde et obeissance, et donné lettres de grace, pardon et
remission purement et absolutement, avoec la restitucion de leurs privilegez, coustu
mez et usagez, si comme ces cosez et autrez poeuent plus plainement apparoir
par le contenu des ditez lectres. Aprés les quellez grasces et remisson, nos dis
subgéz de nostre bonne ville de Gand nous ont fait pluiseurs suplicacions, les quellez
nous avons receuez, fait veoir et viseter diliganment par les gens de nostre
conseil, a grant et a meure deliberacion, lez quellez veuez, pour le dit commun
de tout le païs, pour esquieuer toutez disencions qui d’orez en avant s’en
pueent sieurre, de nostre grace, pour amour et contemplacion de nos bons
subgéz, avons ordonné sus les ditez suplicacions par le maniere qui s’enssieut.
¶ Premiers, sur ce que il nous ont supliiet que nous vosissons confremer
les privillegez des villez de Courtray, d’Audenarde, de Grantmont, Nievle, Tenr
emonde, Ruplemonde, Alost, Halst, Axele, Breveliet, Donse et des casteleriez
et plat païs d’icellez villez, nous avons ordonné que les abitans d’icellez ditez
villez venront pardevers nous et nous aporteront leurs dis privilegez, lez
quelz nous ferons veoir par les gens de nostre conseil, et yceulx veus nous
en ferons tant que tous nos dis bons subgéz de Gand, comme ceux des bonnez
villez, en deveront par raison estre contens. Et, se aucuns des dis privilegez esto
ient perdus par cas de fortune ou autrement, nous en ferons faire bonne
infourmacion, et, ycelle veue, y pourverons comme dit est. ¶ Item, sur ce
qu’il nous ont supliiet dou fait de la marcandise, avons volut et
consentit que le marcandise ait cours et licitement par nostre païs de
Flandrez, en paiant les deniers acoustuméz. ¶ Item, sur ce que ilz sup
pliient que, se aucuns des habitans de nostre dite ville de Gand ou de lers
complisez estoient arestéz ou tamps a venir, en aucun païs hors de nostre
dit païs de Flandrez, pour ocazion des debas et disencions dessus dis, que
d’icellez feissons tenir paisiblez, et nous leur avons otroiet que, se aucuns pb 218 r