pb 23 v
gardeez. Il parlerent as gardes et leur remonstrerent ce pourquoy
il estoient la venu. Les gardes respondirent que volentiers il en yroi
ent parler au bruguemestre et as jurés qui la les avoient establis,
enssi qu’il fissent. Li bruguemestre et li juret respondirent: "Dittez
leur que nous en arons avis et conseil." Il retournerent, et fissent
ceste response. Adont se departirent des bailles ly commis Jehan
Lion et retournerent viers leurs gens qui toudis tout bellement a
prochoient Bruges. Quant Jehan Lion oï la response, sy dist: "Avant !
avant ! alons de fait a Brugez. Se nous atendons tant que il soient con
silliet, nous n’y enterons point fors a painne, si vault mieux que nous
lez asaillons avant que il se conseillent que apriés, par quoi soudainement
il soient soupris." Chils pourpos fu tenus, et vinrent ly Gantois jusques
as barrieres de Bruges et as fossés, Jehan Lion tout devant montéz
sus I noir moriel, et mist tantos piet a terre et prist sa hache
en sa main. Quant cil qui gardoient le pas, qui n’estoient point
si fors adonc, comme il est ores, veirent venus les Gantois en con
venant pour asaillir, si furent tout effraé, et s’en alerent ly
aucun parmy le grant rue jusques au marchiet, : "Vé les ci ! Vé les chy,
les Gantois ! Or tos as deffensez ! il sont ja devant nos portes."
Chil de Bruges qui s’asambloient ou marchiet pour eulx consil
lier, furent tout effraé, et n’eurent li grant mestre nul loisir
de parler ensamble ne de ordonner nullez de leurs besongnes,
et voloient la grigneur partie de la communaulté que tantos on
leur alast ouvrir les portes. Il convint que cils consaulx fust
tenus, autrement la cose euist mal alé sus les ricez hommes de
la ville, et s’en vinrent li bruguemestre et tout ly eschevin et
moult d’aultre peuple a le porte ou li Gantois estoient, qui grant
apparant d’asaillir faissoient. Li bruguemestre et li signeur
de Bruges qui l’avoient a gouverner pour che jour, fissent ouvrir
le guichet et vinrent as baillez parlementer a Jehan Lion. En
che parlement il furent si bien d’accord que par grant amour
on leur ouvry les bailles et le porte, et entrerent tout ens.
Et chevauchoit Jehans Lions daléz le brughemestre, qui bien
se monstroit a estre hardis et outrageus homs, et toutes ses
gens arméz au cler le sievoient par deriere. Et fu adont tres pb 24 r