pb 33 r
tant que il n’en voloient point estre nommé ne renommé, et se voloient bouter
hors de le presse, et tout il faissoient et consentoient, dont chierement le
comparerent puisedi tout li plus rice et li plus sage, car tant laissierent ces
folles gens convenir, que il furent signeurit et menet par iaulx, ne il n’osoient
parler de cose que il vosissent dire ne faire. La raison que cil de Gaind y mettent,
il dient que pour Jehan Lion ne pour Ghisebrest Mahieu ne pour leurs lina
gez ne pour leurs guerrez ne enviez il ne se fuissent jamais ensonniiet
ne bouté si avant en la guerre fors que pour garder leurs francissez tant
des bourghesiez que d’autres cosez. Et quoy que en guerre, en hainne et en
mautallent il fuissent l’un contre l’autre, si voloient il estre tout un au
besoing pour tenir, garder et deffendre les francissez bourghesiez de Gaind,
enssi que depuis il le monstrerent, car il furent, leur guerre durant
qui dura priéz de VII ans, si bien d’accord que onquez n’eurent entre
iaulx estri dedens la ville. Et ce fu ce qui plus les soustint et garda que
autre cose, ens et hors, il estoient si en unité que point de diferent n’y
avoit, méz metoient avant or et argent, jeuiaulx et chavance, et qui le
plus en avoit, il l’abandonnoit, enssi comme vous oréz recorder ensiew
ant en l’istoire.
SHF 2-131 sync Ne demora depuis gairez de tamps que li contez de Flandrez fu partis
de Gaind et revenus a Lille, que messires Oliviers de Hauterive, cousins
germains a Rogier d’Auterive que cil de Gaind avoient ocis, envoiia
deffiier le ville de Gaind pour la mort de son cousin, ossi fissent messires
Phelipprez de Maminez, ly Gallois de Maminez, et pluiseurs autrez. Et, tantos
ces deffiancez faitez, il trouverent environ XL navieurs de Gaind, bourgois
de Gaind, qui amenoient par le riviere d’Escaut bleds a Gaind. Si se contreveng
ierent de le mort de leur cousin sus cez navieurs et les decopperent trop
villainnement et creverent les yeulx, et les renvoiierent enssi a Gaind a
follés et mehaigniéz. Le quel despit cil de Gaind tinrent a grant. Ly
juret, qui estoient en le loy pour ce tamps, as quelz ces plaintez vinrent,
furent tout courouchiet et n’en seurent bonnement que dire ne qui
encouper, fors que les faisseurs. Murmurations monta aval la ville.
Et disoient li grigneur partie dez gens de Gaind que li contez de Flandres
avoit che fait, ne a painez l’osoit nulz homs de bien escuser. Sytos que
Jehans Prouniaux entendi cez nouvellez, qui estoit pour le tamps des
Blans Capprons ly plus grans mestrez et cappitains, sans sonner mot
ne parler as juréz de la ville, ne say se il en parla as autrez cappitains, pb 33 v