Online Froissart
Home  |  Navigate  |  Apparatus  |  Search  |  About the Edition  |  About the Project  |  Help
Facsimile mode    Settings    Browse  |  Collate      
Navigate | Close
Preferences
Leiden VGGF 9 (vol. 2)
Previous | Folio 41 v | Next
pb 41 v
Quentin, et envoiia le signeur de Clari et messire Tristram de Roie et messire Guy
de Honcourt a Hen en Vermendois, dont il se tenoit enssi que sirez, pour
entendre a la ville et remparer, car elle est grande et estendue et mal fremee.
Sy ne voloit miez que par se negligense elle recheuist nul damage
des Englés.
SHF 2-147 sync La nuit que li Engléz se logierent a Clari sus Somme, s’avisserent aucun chevalier
de leur costé, tels que messires Thumas Trivet, messires Guillaumes Clinton, messires
Yon Fil Warin, par l’esmouvement le signeur de Vertaing qui congnissoit le païs
et qui sentoit le signeur de Couchi a grant gent d’armez en la citté d’Arras,
que il chevaucheroient au matin avoecquez les fourageurs de l’ost, assavoir se
il trouveroient jamais cose qui bonne leur fust, car il desiroient a faire fait
d’armez. Enssi comme il l’aviserent, il le fissent, et se partirent au matin environ
XXX lancez, et fissent les fourageurs chevauchier devant, et chevauchierent
a l’aventure. Ce propre jour au matin, party et issi d’Arras a grant route ly
sirez de Couchi, et prist le chemin de Saint Quentin. Quant il furent sus
les camps, ly sirez de Brimeu et si enffant, environ XXX lancez, issirent hors
de la route le signeur de Couchi, enssi que cil qui desiroient lez armez et
qui demandoient aventurez. Si se trouverent sus les camps Engléz et
François, et veirent bien et parchurent que il convenoit que il se veissent de
plus priéz, si esperonnerent tantos ly un contre l’autre, en escriant leur cri.
De premierez venuez, il en y ot ruéz jus dez mors et des bleciéz, de l’une partie et
de l’autre. Et la, selonc leur quantité, i ot fait bellez appertissez d’armez, et se missent
tantos tout a piet l’un contre l’autre, et commenchierent a pouser dez lancez.
La veit on les plus fors et les plus appers et lez mieux combatans, et moult bien
se porterent et ly une partie et ly autre. Et furent en cel estat environ une
heure, toudis combatant et poussant, et faissant d’armez ce que on en
pooit par raison faire, que on ne seuist a dire ne ymaginer, qui lez veist, ly
quel en aroient le milleur. Mais finablement la place demora as Engléz
et le obtinrent. Et prist de sa main messires Thumas Trivéz le signeur de Brimeu
et sez deus filz Jehan et Loïs, et en y ot la pris sus le place environ XVI hommez
d’armez, ly demorant se sauverent ou furent mort. Enssi alla de ceste aven
ture as Englés le signeur de Couchi, et retournerent messires Thumas Trivéz et
sa route en l’oost a tout leur gaaing, et furent li bien venu dou conte de Bou
quighem et des aultrez, che fu raisons. Si sejourna ly hoos sus la riviere
de Somme, en venant de Pieronne, un jour et une nuit, pour tant que che jour
il fissent leur monstre, car il entendirent par leurs prisonniers que ly sirez pb 42 r