pb 63 v
et pour veoir lez armez, aucun chevalier et escuier de Franche estoient venu a
Marceaunoy en la conté de Blois, et tant que messires Renaulz de Touars, sirez
de Poissancez, un baron de Poito, en prist parollez au signeur de Vertaing,
et dist que volentiers il feroit fait d’armez a luy de trois poulz de lancez,
de trois cops d’espees et de trois cops de hacez. Ly sirez de Vertaing ne le
volt miez refuser, mais ly acorda, et lez volt tantos faire et delivrer le
chevalier, a quel damage ne pourfit que ce fust. Mais li contez de Bouquighem
ne le volt pas consentir que adont il en fesissent riens. Nonpourquant
lez parollez des emprissez d’armez demorerent en pourpos des II chevaliers,
et tels parollez samblablez eurent la a ce jour a Marceaunoy uns escuiers
de Savoie, qui s’appelloit ly bastars Clarins, a Edouwart de Biaucamp,
fil a messire Rogier, mais tout se passerent adont enssi ly un comme ly autre,
et ly Gallois d’Aunai a monsigneur Guillaume Clinton, et messires Lionnaulx d’Ar
rainnez a messire Guillaume Franc. Quant li contez de Bouquighem et ly En
gléz furent logiet ens es fourbours de Nantez, si comme chi dessus est dit,
cil chevalier et escuier dou costé des François estoient dedens Nantez. Sy
requissent ly sirez de Vertaing et ly autre de son léz et fissent requerre
a cheulx qui les avoient aparlé d’armez, que devant Nantez ilz lez vosissent
delivrer. Les cappitainnez de Nantez n’eurent miez conseil de chela faire
ne acorder, et escuserent leurs gens, et dissent que il estoient en Nantez
comme saudoiier et gagiet et ordonné pour garder la ville. Ces parollez
se passerent tant que li contez de Bouquighem fu venus et arrestéz a
Vennez et ly aultre signeur a Hainbon, a Camperlé et a Campercorentin, enssi
que vous savéz. Quant il furent la asserissiet, messires Renaulz de Touwars,
messires li Barrois des Barrez, messires Lionniaulx d’Arrainnez et grant fuisson
de chevaliers et d’escuiers s’en vinrent au Castiau Josselin a VII lieuwez de
Vennez, ou li connestablez de Franche se tenoit, et li contez de le Marce et
grant fuisson de chevaliers de Franche, qui volentiers lez veirent et bellement
les requellierent. Adont s’esmurent lez parollez devant le connestable
en remonstrant comment il avoient enpris tels et tels a faire fait
d’armez as Engléz. Ly connestablez oÿ volentiers cez parollez et dist: "Envoiiéz
deviers eulx, et nous leur donrons saufconduit de faire fait d’armez,
se il voellent venir." Si envoiierent premierement ly Gallois d’Aunay
et messires Lionniaux d’Arrainnez a ceulx ou il s’estoient ahaty de faire
fait d’armez et de assir trois cops de glavez a chevalx. Quant messires
Guillaumez Clinton et messires Guillaumez Franc entendirent que il estoient semons pb 64 r