pb 74 v
chevalerie et sez commugnez de Brugez, d’Ippre, de Courtray, d’Audenarde, dou Dan,
de l’Escluse et dou Franc de Brugez. Et estoient les gens dou conte quatre
contre I des Gantois, dont il avint que, quant lez bataillez dou conte
furent toutez remissez ensamble, il y ot grant gent, et ne lez peurent
souffrir ly Gantois, mais se ouvrirent et recullerent viers la ville, et ly chevalier
et ly gent dou conte lez commenchierent fort a aprochier et a desrompre.
Sitos que il lez eurent ouviers, il entrerent ens, si lez abatoient et les tuo
ient a mons. Adont se retraissent ly Gantois vers le moustier de Nieule, qui
estoit fors, et la se rasamblerent, et i eut grant bataille et grant occision
des Gantois au rentrer ou moustier. Jehans de Launoit, comme tous esbahis
et desconfis, entra ou moustier, et pour ly sauver il se bouta en une grosse
tour dou clocier, et cil qui peurent de sez gens avoecquez ly, et Rassez de Her
sellez demora dehors, qui gardoit l’uis et requelloit sez gens, et fist a l’uis
grant fuisson d’apertissez d’armez, mais finablement il fu efforchiéz et
ferus de une longue picque tout oultre le corps, et la abatus et tantos par
occis. Enssi fina Rassez de Herselle, qui avoit esté uns grans cappitains en
Gaind contre le conte, et que ly Gantois amoient moult pour son sens et
pour sa proece, mais de sez vaillancez il en eut en fin che leuwier. Quant
li contez de Flandrez fu venus en la place devant le moustier, et il vei que
li Gantois se requelloient la dedens et estoient requelliet, il commanda a
bouter le feu ou moustier et tout ardoir, sez commandemens fu tantos
fais, et li feus aportéz et grant fuisson d’estrain et de velourdez que
on mist et apaia tout autour dou moustier. Et puis bouta on le feu
dedens. Chils feus monta tantos amont, qui s’esprist ens es couvreturez
dou moustier, la moroient ly Gantois qui estoient ou moutier a grant
martire. Car il estoient ars, et, se il issoient hors, il estoient esboullé
et regetté ou feu. Jehans de Launoit, qui estoit ou cloquier, se veoit ou
point de la mort et estre tous ars. Car li cloquiers s’esprendoit a ardoir.
Si crioit a ceulx qui estoient bas: "Raenchon ! Raenchon !" et offroit sa taisse,
qui estoit toute plaine de florins, mais on n’en faissoit que rire et galler,
et li dissoit on: "Jehan, Jehan, venéz cha par cez fenestrez parler a nous, et nous
vous requellerons. Faitez le biau saut, enssi que vous avéz euwan fait
saillir lez nostrez, il vous convient faire che saut." Jehans de Launoy, qui
se veoit en tel party et que ce estoit sans remede et que ly feus le quoitoit de
si priéz que il convenoit que il fust ars, entra en hideurs et avoit pb 75 r