pb 95 v
lez Morez ou ou roiaulme de Grenade ou de Bellamari, pourquoi, se enssi en estoit
avenu, il lez tenoient la ossy bien perdus comme en devant. Et che leur despla
isoit trop grandement, et lez regretoient et plaindoient durement. Au voir dire,
il faissoient bien a plaindre. Car cil bon chevalier et escuier desus nommé furent tant
et si dur tempesté de mer que onquez gens sans mort ne furent en plus grant
dangier ne peril, et furent et passerent lez destrois de Marios et lez bendez
dou roiaulme de Tramesainnez et de Bellamari, et furent par pluiseurs fois en trop
grant aventure de estre pris et arresté dez Sarrasins. Et eux meismez se conto
ient pour mort et n’avoient miez espoir de venir a terre jamais ne a port
de salu. Et furent XL jours en che dangier. En le fin, il eurent I vent qui lez
rebouta, vosissent ou non, en la mer d’Espaigne. Quant cilz vens leur fu fallis, il
waucrerent et trouverent d’aventure II grossez nefs de Lusebonne qui s’en
venoient, si com ilz dissent puis, en Flandrez, cargiéz de marcheandissez.
Chil signeur tournerent celle part et bouterent leurs pennons et leurs estr
amierez hors, et vinrent a cez nefs de Lusebonne, ou il n’avoit que marceans
dedens, qui ne furent miez bien a seur, quant il veirent che vaissel armé
et les parurez de Saint Jorge en pluisieurs lieux. Toutezfois, quant il s’aprochie
rent, il se recongneurent et se fissent grant feste, mais cil marchant re
missent derechief cez chevaliers en trop grant peril, je vous diray pourquoy.
Il demanderent dez nouvellez de Portingal, et li Engléz estoient trait a siege
devant Seville et avoient la le roy dan Jehan de Castille asegiet. De cez nouvellez
furent il moult resjoy et dissent que il yroient celle part. Car il estoient ossy
sus la frontiere de Seville. Adont se departirent il l’un de l’autre et leur laissierent
ly Portingallois des vins et dez pourveancez pour eux rafresquir. Et dissent ly
Gascon a leurs maronniers : "Menéz nous a Seville. Car la sont nos gens au siege." Ly
maronnier respondirent : "Ou nom de Dieu!" et tournerent vers Seville. Et single
rent tant que il l’aprochierent. Ly maronnier, qui furent sage et ne voloient
pas perdre leurs maistrez, fissent monter amont ou castiel de leurs mas
I effant, assavoir se il veoit nul apparant de siege par mer ne par tiere devant
Seville. L’enffant ot bonne veue et juste, sy respondi que nom. Adont dissent ly
maronnier as signeurs : "Entendéz, biau signeur, vous n’estez pas bien enfourmé.
Car pour certain il n’a siege nul, ne par mer ne par tere, devant Seville. Car, se il
y estoit, aucun apparant en seroient ou havene. Si n’avons que faire de la aler,
se vous ne volléz perdre, car, pour certain, li rois de Castille se tient la, et est
la chitéz de son roiaulme ou il se tient le plus volentiers." A grant dur en peurent
ly maronnier estre creü. Toutezfois, il furent creü, et singlerent toute la bende
de Seville. Et entrerent en la mer de Portingal, et vinrent ferir ou havene de pb 96 r