pb 9 r
mont. Bien savoit que li castiaulx n’estoit point gardés fors que dou por
tier seullement. Enssi qu’il chevauchoit a le couverte tout quoiement de
vant Aloise, Ainmerigos regarda et voit que li portiers seoit sus une
tronce de bois au dehors dou castiel. Adonc dist la uns Bretons qui trop bien
savoit jeuer de l’abalestre: "Voléz vous que je vous rende tout mort
ce portier et dou premier cop?" "Oil," ce dist Ainmerigos, " je t’en pri." Chils ar
balestriers entoisse et trait I quariel et assene le portier de droite
vissee en la teste et li enbare tout ens. Li portiers qui estoit navréz a
mort, se sent ferus et rentre en la porte, et quida refremer le guichet
en rentrant. Mais il ne peut, car il chei la tous mors. Ainmerigos
et si compaignon se hasterent et vinrent a le porte et entrerent ou
guichet, si trouverent mort le portier et sa femme dalléz lui toute effraee,
a le quelle il ne fissent nul mal, mais ly demanderent ou ly castelains
estoit. Elle respondy que il estoit en Clermont. Li compaignon assegurerent la
femme de sa vie, affin que elle leur baillast les clés dou castiel et de la mestre
tour. Elle le fist, car en ly n’i avoit point de deffense. Et puis le missent
hors et ly rendirent toutez ses coses, voire ce que porter en peut. Si s’en vint
a Saint Flour, une citté a une lieuwe de la, ly quel furent moult esbahi,
quant il sceurent que Aloisse estoit englesce, et ossi furent cil dou païs
environ. Assés tost apriés reprist Ainmerigos Marcel le fort castiel de
Vallon et l’embla par eschiellement. Et quant il fu dedens, la cappitaine
dormoit en la grosse tour qui n’estoit miez a prendre de force, car par
celle tour se pooit tous li castiaulx recouvrer. Adonc s’avisa Ainmerigos
d’un soutil tour, car il tenoit le pere et le mere dou cappitaine, si les fist
venir devant le tour et leur fist samblant que il les feroit la decoler,
se leurs filz ne rendoit la tour. Lez bonnez gens doubtoient le mort, si dissent
a leur fil estoit en la tour, que il l’en presist pité de eulx, et plouroient
tout doi moult tenrement. Ly escuiers se ratenri grandement, et n’euist ja
mais son pere ne sa mere laissié morir, sy rendi tantos le tour, et on les
bouta hors dou castiel. Enssi fu Vallon englesse, qui moult greva le païs,
car toutez manierez de gens qui voloient mal faire, s’i retraioient ou en
Calusiel, a deus lieuez de Lymogez, ou en Carlat ou en Aloise ou en Ven
tadour ou en pluiseurs autrez castiaulx. Et quant cez garnissons s’asambloient,
il pooient bien estre VC ou VIC lances et couroient tout le païs et la
terre au conte dauffin qui leur estoit vosine, ne nulz ne leur aloit au
devant tant que il fuissent ensamble. Bien est veritéz que li sirez d’Achier pb 9 v