par election depar les bonnes villes a leurs
gaiges, chascune bonne ville pour se rate.
Et si y avoit bien XXIIIIM archiers a pié
sans la ribaudaille. Tout ainsi que les
batailles furent ordonnees on chevauça
tout rengiés aprés les Escos a l’assent des
fumieres jusques a basses vespres. Adont
se loga l’ost en un boys sur une petite riviere
pour eulz aisier et pour attendre le charroy
et les pourveances. Et tout le jour avoient
ars les Escos a V lieues pres de leurs ostz
et ne les pouoient raconsuir. L’endemain,
au point du jour, chascun fu armé et
trairent les banieres aux champs, chascun
a sa bataille et desoubz sa baniere, si comme
ordonné estoit. Si chevaucierent les
batailles ainsi rengiees tout le jour sans
desrouter par montaignes et par valees, ne
onques ne porent approuchier les Escos,
qui ardoient devant eulz, tant y avoit de
bois, de maréz et de desers sauvages et
malaisies, montaignes et valees et si
n’estoit nul qui osast sur la teste a couper,
fourpasser ne chevaucier devant les ba
nieres horsmis les mareschaux.
SHF 1-30 sync Comment les Englois poursuivoient
les Escos sur la riviere de Thin.
Quant ce vint aprés nonne sus le
vespre et gens, chevaux et charroy
et meisment gens a pié estoient si traveil
liés qu’ilz ne pouoient mais en avant aler.
Et les seigneurs s’apparceurent et virent
bien clerement qu’ilz se traveilloient en
telle maniere pour neant et fust encores
ainsi que les Escos les voulsissent attendre,
si se mettroient il bien sur tel avantage
sur celle montaigne ou sur tel paÿs qu’ilz
ne se pourroient a eulz combatre sans trop
grant meschief. Si fu commandé depar le
roy et les mareschaux que on se logast la
endroit, chascun ainsi qu’il estoit, jusques
a l’endemain pour avoir conseil comment ilz
se maintenroient. Ainsi fu tout l’ost logié
celle nuit en un boys sur une petite riviere
et le roy fu logié en une povre court d’abbaie
qui la estoit. Ses gens d’armes, uns et autres,
chevaux, charroy et les hostilz suivans furent
logiés moult ensuz traveilliés oultre mesure.
Quant chascun ot piece de terre pour logier,
les seigneurs se trairent ensemble pour pb 11 r