Online Froissart
Home  |  Navigate  |  Apparatus  |  Search  |  About the Edition  |  About the Project  |  Help
Facsimile mode    Settings    Browse  |  Collate      
Navigate | Close
Preferences
New York M804
Previous | Folio 111 v | Next
pb 111 v

et roidement. Ceulz de la ville et du chastel
se defendirent vassalment si qu’ilz ne pardirent
riens. En la garnison avoit un cappitaine
depar messire Charles de Bloys escuier appellé
Tassart de Guines, moult bon homme d’armes.
Or y eut tel meschief que les III pars de
la ville estoient en cuer plus englois que
françois, si prindrent leur cappitaine et
lui dirent qu’ilz l’occiroient s’il ne s’acordoit
avec eulx aux Englois. Et quant il leur
eut promiz qu’il feroit ce qu’ilz voulroient,
ilz commencierent a traittier devers les dis
chevaliers englois. Finablement le traittié
se porta tel qu’ilz se tournerent de la partie
de la contesse de Monfort. Et demoura le
dit Tassart comme devant cappitaine de la
ville. Et quant les Englois repairierent
devers Haimbont, ilz laissierent grant
foison de gens d’armes et d’archiers pour
la forteresce aidier a garder. Quant messire
Charles de Blois sceut que la Roche Darien
estoit tournee englesce, il jura qu’il ne
demourroit mie ainsi. Si manda partout
les seigneurs de sa partie en Bretaigne et en
Normandie et fist un tel amas en la cité
de Nantes qu’il eut bien XVIC armeures
de fer et XIIM hommes de pié et bien IIIIC
chevaliers et entre ces IIIIC XXIII banieres.
Si se party de Nantes le dit messire Charles
et vint assegier a tout ces gens la ville et
chastel de la Roche Darian. Grans engins
fist drecier devant qui gettoient nuit et jour
et traveillierent moult ceulx de la ville.
Lesquelx envoierent tantost messages
devers la contesse de Monfort en remoustrant
comment ilz estoient constrains et requieroient
que on les confortast. Car on leur avoit
en couvent s’ilz estoient assegiés, la contesse
et les III chevaliers dessus nomméz ne l’eussent
pour leur honneur jamais laissiés. Sy
envoia partout la dicte contesse de Monfort
ses messages ou elle pensoit avoir gens,
et fist tant qu’elle eut en pou de temps M
armeures de fer et VIIIM hommes de pié. Si
le mist tous en la garde et conduit des III
chevaliers dessus nomméz, qui baudement
et voulentiers les receurent et distrent a
leur departement qu’ilz ne retourneroient
mais si aroient la ville et le chastel dessegiéz

ou ilz mourroient tous en la paine. Puis
s’i mistrent en chemin et s’en alerent celle
part a grant exploit. Et quant ilz
furent venuz a II lieues pres de l’ost
des François, ilz se logierent sur une ri
viere en entention de combatre l’endemain.
Et quant ilz furent logiés et miz a repos,
messire Thomas Dagorne et messire Jehan
de Harcelles prindrent environ la moitié
de leurs gens si les firent armer et
monter a cheval coiement. Puis s’en
partirent et droit environ heure de mie
nuit, ilz se bouterent en l’ost messire Charles
de Blois a l’un des costéz, si y firent grant
dommage et occirent et abatirent grant
foison de gens. Et demourerent tant en
ce faisant que tout l’ost fu estourmy et
arméz toutes manieres de gens. Et ne
se peurent partir sans bataille. La furent
ilz encloz et combatuz et reboutéz aspre
ment et ne peurent porter le fes des
François. Si y fu doulereusement navré
messire Thomas Dagorne et se sauva au
mieux qu’il peut le dit messire Jehan
de Harcelles et une partie de ses gens mais
la greigneur partie y demourerent mors
ou prisonniers. Ainsi tout desconfiz
retourna le dit messire Jehan a son com
paignon monseigneur Taneguy du Chastel et
les autres qui estoient logiés sur la
riviere. Lesquelx furent de la perte de
leurs compaignons si esbahiz qu’ilz
eurent conseil qu’ilz se deslogeroient et
se retrairoient vers Haimbont.
SHF 1-305 sync La bataille de la Roche Darian.
Miniature

pb 112 r