Online Froissart
Home  |  Navigate  |  Apparatus  |  Search  |  About the Edition  |  About the Project  |  Help
Facsimile mode    Settings    Browse  |  Collate      
Navigate | Close
Preferences
New York M804
Previous | Folio 117 r | Next
pb 117 r

en celle nuit par nuit. Si le signifia le
dit Aimery par un sien frere ainsi au roy
d’Engleterre. SHF 1-318 sync La bataille de Calais.
Miniature

Quant le roy sceut ces nouvelles
et la certaineté du jour qui
arrestéz y estoit, si manda
messire Gautier de Mauny,
en qui il avoit grant fiance, et plusieurs
autres chevaliers et escuiers pour mieux
fournir son fait. Quant messire Gautier
fu venu, si lui compta pourquoy il l’avoit
mandé et qu’il le vouloit mener a Calais.
Messire Gautier lui accorda legierement.
Si se departy le roy d’Engleterre a IIIC hommes
d’armes et VIC archiers de la cité de Louvres
et vint a Douvres et mena son filz le joenne
prince avec lui. Si monterent le dit roy
et ses gens ou dit port de Douvres et vin
drent sur une vestree a Calais et si em
buschierent si quoiement que nul n’en sceut
riens pourquoy ilz estoient la venuz. Et
se bouterent les gens du roy ou chastel
en tours et en chambres, et le roy meismes.
Et ordonna ainsi et dist a messire Gautier
de Mauny : "Messire Gautier, je vueil que
vous soyéz de ceste besoingne chief car
moy et mon filz nous combaterons soubz
vostre baniere." Messire Gautier respondy :
"Dieux y ait part si me feréz haute honneur."
Or vous diray de monseigneur Gieufroy de
Chargny, qui ne mist mie en oubli l’eure
qu’il devoit estre a Calais, mais fist son
amas de gens d’armes et arbalestiers en
la ville de Saint Omer. Puis se party du
soir et chevauça avec sa route et fist
tant que aprés mienuit il vint asséz pres

de Calais. Lors attendirent la l’un l’autre.
Si envoia le dit messire Gieufroy devant
jusques au chastel de Calais II de ses escuiers
pour parler au chastellain savoir s’il estoit
heure et s’ilz trairoient avant. Les escuiers
tout secretement chevaucierent oultre
et vindrent jusques au chastel de Calais
et trouverent Aimery, qui les attendoit
lequel parla a eulx et leur demanda ou
messire Gieufroy estoit. Ilz respondirent
qu’il n’estoit point loing, mais il les avoit
la envoiéz pour savoir s’il estoit heure.
Aimery dist : "Oyl. Aléz et le faites traire
avant. Je lui tenray son couvent mais
qu’il me tiengne le mien." Les escuiers
retournerent et racompterent ce qu’ilz
avoient veü et oy. Adont se trait avant
messire Gieufroy et par ordonnance de
bataille fist passer toutes les gens d’armes
et les arbalestiers aussi dont il avoit grant
foison et passerent oultre la riviere et
le pont de Nulais et approuchierent
Calais. Et envoia devant le dit messire
Gieufroy XII de ses chevaliers et C ar
meures de fer pour prendre la saisine de
Calais. Car bien lui sembloit que s’il avoit
le chastel, il seroit sire de la ville parmy
ce qu’il estoit asséz fort de gens et encore
sur I jour il en aroit asséz s’il besoignoit.
Si fist delivrer a monseigneur Oudart de Renty,
qui estoit en celle chevaucee, XXM escuz pour
paier Aimery. Et demoura tout quoy
avec ses gens le dit messire Gieufroy
sa baniere devant lui sur les champs au
dehors de la ville et du chastel. Et estoit
son entente que par la porte de la ville
il entreroit a Calais et autrement n’y
vouloit il entrer. Aimery de Pavie, qui
estoit tout avisé de son fait, avoit avalé
le pont du chastel de la porte des champs,
si mist ens tout paisiblement tous ceulz
qui entrer y vouldrent. Quant ilz furent
amont ou chastel, messire Aimery demanda
ou les escuz estoient. Monseigneur Oudart de
Renty lui delivra tout prest en un sac.
Et lui dist ilz sont tous bien comptéz.
"Tenéz, comptéz les se vous vouléz." Aimery
respondy : "Je n’ay mie loisir tant car il sera
tantost jour." Lors prist le sac aux florins pb 117 v