en la chambre du duc et lui requist moult
aigrement qu’il voulsist emprendre le
fes des besongnes du royaume et y mettre
conseil par quoy le regne qui a lui devoit
parvenir feust si bien gardé que telz
manieres de compaignes qui regnoient
n’alassent mie gastant ne robant le paÿs.
Le duc respondi que tout ce feroit il
voulentiers s’il avoit la mise, dont il le
peust faire mais cil qui faisoit lever les
prouffiz et les droitures du royaume
le devoit faire si le feist. Lors multiplierent
paroles tant et si hault que ylec en la
presence du duc furent occiz III des grans
de son conseil si pres de lui que la robe
en fu ensanglantee. Et en fu il meismes
en grant peril mais on lui donna un
des chapperons a porter et couvint qu’il
pardonnast la mort d’iceulx III chevaliers
les II d’armes et le tiers de loys, c’estoient
monseigneur Robert de Clermont gentil et noble
homme grandement, le seigneur d’Esconflans
et messire Simon de Bussi, de quoy ce fu
pitié quant pour bien dire et bien conseillier
leur seigneur ilz furent ainsi occiz.
SHF 1-411 sync Comment le roy de Navarre yssi de
la prison de France.
Aprés avint que aucuns chevaliers
de France, messire Jehan de Pique
gny et autres, vindrent sur le confort
du prevost des marchans et des consauls
des aucunes bonnes villes. Au fort chastel
de Alues en Pailleul seant en Picardie
ou le roy de Navarre estoit pour le temps
emprisonné en la garde messire Tristran
du Boys. Si aporterent les dis exploiteurs
telles enseignes et si certaines au dit
chastellain et si bien espierent que messire
Tristran n’y estoit point. Et fu par l’emprise
dessus dicte le roy de Navarre delivré hors
de prison et amené a grant joie en la
cité d’Amiens ou il fu liement recueilliz
et conrois. Si descendy chies I chanoine
qui grandement l’amoit que on clamoit
messire Guy Kieret. En l’ostel duquel il
fu XV jours. Tant que on lui eut appareillié
tout son arroy et fu asseure du duc de
Normandie car le prevost des marchans pb 138 r