La mort des Jaques pres de Clermont et ailleurs.
Quant les gentilzhommes de
Beauvoisiz, de Corbiois, de
Vermendois, de Valoys et des
terres ou ces mescheans gens
conversoient et faisoient leur
forsenerie, virent ainsi leurs maisons
destruites et leurs amiz tuéz, ilz manderent
secours a leurs amis en Flandres, en Henaut,
en Braibant et en Hesbaing. Si en y vint
tantost de tous costéz asséz et s’assemblerent
les gentilzhommes estranges avec ceulx
du paÿs qui les menoient. Lors commen
cierent aussi a occire et decouper ces
mescheans gens sans pitié et sans mercy
et les pendoient aux arbres la ou ilz les
trouvoient. Meismement le roy de Na
varre en mist un jour a fin plus de
IIIM asséz pres de Clermont en Beauvoisiz
mais ilz estoient ja tant multipliéz que
s’ilz eussent esté tous ensemble, ilz feussent
bien CM hommes. Et quant on leur demandoit
pourquoy ilz faisoient ce, ilz respondirent
qu’ilz ne savoient mais ilz veoient les
autres faire si le faisoient aussi. Et
pensoient qu’ilz deussent en telle maniere
destruire tous les nobles et gentilz
hommes du monde par quoy nul n’en peust
estre. En ce temps se parti le duc de Nor
mandie de Paris car il se doubta du
roy de Navarre, du prevost des marchans
et leurs aides et vint au pont de Charenton
sur Marne. Et fist un grant mandement
de gentilzhommes la ou il les peut avoir,
si deffia le prevost des marchans et
ceulx qui lui vouloient aidier. Si eut
le prevost doubte que de nuit on ne venist
courir Paris qui point n’estoit fermee.
Lors prist ouvriers quanqu’il en peut
avoir de toutes pars et fist faire grans
fosséz entour de Paris et puis chaingles
murs et portes si y ouvroient nuit et
jour le terme d’un an tous les jours bien
IIIM ouvriers dont ce fu un grant fait
que de fermer sur une annee et environner
de toutes defences une cité de si grant
circuite. Ce fu le plus grant bien que le
prevost fist en sa vie car autrement Paris
eust esté depuis gastee et robee souvent. pb 139 r