leur subgiection et raençonnoient et roboient
a leur voulenté sans mercy. Et par especial
cil Albert et sa route y firent trop de vilains
fais. Si avoient pris ces gens, que on nom
moit gens d’armes, pilliés, robéz, ars et tout
destruit la bonne ville Daumary, Esparnay
et la bonne ville de Vertus et toutes villes
selon la riviere de Marne des cy au Chastel
Thierry et tout ainsi environ la cité de
Rains et avoient gaingnies la bonne ville
de Ronay et le fort chastel de Hans en
Champaigne et tout pris et robé quanque
trouvé y fu et tout en amont jusques
a Sainte Meneheus en Partois. Et le plus
grant et renommé cappitaine entr’eulx et
qui plus souvent chevauçoit et faisoit
des grans appertises d’armes, c’estoit
messire Eustace d’Aubrechicourt. Cil tenoit
dessoubz lui on paÿs de Champaigne, Pons
sur Saine, c’estoit sa chambre, Nogent sur
Saine, Dameri, Luci, Saponay, Trochi, Arsi sur
Aube, Plansi et pluseurs autres forteresces. Et
plus avant sur la marche de Bourgoingne
et de Partois se tenoient autres guerrieurs
qui s’appelloient Thibaut de Chaufour
et Jehan de Chaufour et avoient au tiltre
du roy de Navarre pris en l’eveschié de
Lengres un treffort chastel qui s’appelloit
Montsangon. Leans avoit IIIIC combatans
qui guerroierent tout le paÿs et couroient
jusques en l’eveschié de Verdun et raen
çonnoient tout ne riens ne duroit devant
eulx ne aussi nul ne leur aloit au devant
mais estoient les barons, chevaliers et escuiers
tous ensomnéz de garder leurs maisons
et forteresces. SHF 1-429 sync La prise du conte de Roussi.
D’autre part pardevers Soissons et
entre Laon et Reins se tenoient
autres pilleurs qui roboient et raençon
noient tout le paÿs de la entour et parmy
la terre de Coucy. Le sire de coucy et le conte de Roussy
faisoient bien garder par gens d’armes
qu’ilz avoient retenuz a leurs gaiges et
a leurs fres, leurs chasteaux et forteresses.
De ces pillars estoit la souveraine gar
inson en ce paÿs belli. Si l’avoient moult
fortifiee et estoient bien dedens VIC
combatans. Si en estoit cappitaine Rabigot
de Duri, un escuier englois appert homme