Ains venroient passer Somme au point a Saint
Quentin et ystroient hors d’autrepart au léz
devers Lience. Lors chevaucierent sans arroy
qui mieux mieux et vindrent a Saint Quentin
droit a l’aube crevant car il ny avoit que
deux lieues. Quant les gardes de la ville
qui estoient amont en la premiere porte
entendirent cel effroy, ilz demanderent :
"Qui est ce la qui nous approuche de si pres
a ceste heure?" Le connestable de France qui
estoit la venu des premiers respondy : "Ce
sommes nous telz et telz voz ains qui
voulons passer parmy ceste ville pour
adevancier les Navarrois qui se sont
embléz de Thorigni et s’en fuient. Si nous
ouvréz tost, nous le vous commandons
depar le roy." Les gardes respondirent :
"Certes, monseigneur, nous n’avons mie les clefs
elles sont en la ville devers les juréz." Or dist
le connestable : "Aléz les querre et nous ouvréz
les portes." Lors descendirent II hommes de
leur garde et vindrent en leur ville devers
ceulx qui les clefs gardoient et leur
conterent ce que vous avéz oy. Ceulx
respondirent qu’ilz ne feroient pas celle
oultrage de ouvrir les portes de Saint
Quentin a celle heure sans le conseil
de toute la ville, si firent tout estourmir
et assembler les hommes ou marchié. Et
ainçois que ce feust fait, il fu pres de
souleil levant. La fu dit comment ilz
respondroient tous d’un accort. Aprés
vindrent a la porte si monterent amont
la porte ceulx qui devoient respondre et
bouterent leurs testes hors par les fenestres
et distrent : "Chiers seigneurs, ayés nous
pour excuséz ceste fois. C’est le conseil de
la communauté de ceste ville que vous V
ou VI qui la estes y entréz s’il vous plaist
pour l’onneur de vous et les autres voisent
querre voie et adrece la ou il leur plaist."
Quant le connestable et le conte de
Saint Pol l’oirent si ne leur pleut mie bien
et y eut grosses paroles et vilaines mais
nonobstant ce onques ceulz de Saint Quentin
ne vouldrent ouvrir les portes. Et pour
ce se departirent les uns des autres et leur
donna le connestable congié si s’en ala
chascun en son hostel au plus droit qu’il sceut.