deléz eulx pour mieux avoir conseil et
aide. Le chevalier leur accorda parmy
les bons gaiges qu’ilz lui donnerent et
encendi a fortifier la cité la ou il beson
gnoit le plus. En ce temps avint que
ceulx de la garnison de Velli et ceulx de
la garnison de Roussi se cueillirent
ensemble et vindrent prendre par force
et par assaut la ville de Sissonne et en
firent une grant garnison de toutes
manieres de gens assembléz qui avoient
un cappitaine appellé Hennequin Fran
çois et estoit un garçon né de Couloigne
sur le Rin et estoit moult cruel. Ceulx
de ceste garnison firent moult de vilains
fais et ardoient tout sans deport et
occioient hommes, femmes et petiz enfans
qu’ilz ne pouoient raençonner a leur
voulenté. Avint un jour que le conte de
Roussi qui avoit le mautalent de sa ville
de Roussi que les pilleurs dessus dis
lui detenoient, si fist une priere des
chevaliers et escuiers d’entour lui et eut bien
C lances parmy XL hommes a cheval
qu’il amena de la cité de Laon. Et eut le
conte de Porsien, messire Girart de Cavenci,
le seigneur de Montegny en Ostrevant
et pluseurs autres, si chevaucierent vers
Sissonne et trouverent ces Alemans,
nomméz Navarrois, qui ardoient un
villaige si leur coururent sus. Cil
Hennequin et sa route mistrent tantost
pié a terre et rengierent leurs archiers
devant eulx. La eut fort hustin et dur
de II léz et moult bien furent assailliz
ces Navarrois qui estoient gens de
tous paÿs et aussi ilz se defendoient
vaillemment, mais ilz eussent esté descon
fiz, se les bourgois de Laon feussent demoréz,
mais ilz se partirent a petit de fait et se
mistrent au retour a pou de fait. Et les
autres demourerent qui se combatirent
asséz longuement. Touteffois fu pris le
conte de Porsien durement navré et a
grant meschief sauvé la furent pris
le sire de Montigny et messire Girart
de Cavency et pluseurs autres hommes
d’armes. Et le conte de Roussi navré et
pris la seconde fois et livre a Rabigot de
Duri et Robin l’Escot qui l’en menerent