tour de la forteresse. Puis fist signe a ceulz
de la dedens qu’il estoit des leurs. Adont les
compaignons s’avalerent tantost de la tour
et le vindrent querir a la barriere et l’em
porterent entre leurs bras dedens le fort
si lui recousirent benderent et appareillierent
ses plaies et en soingnierent depuis si bien
que il guery. Quant ceulx qui estoient
demouréz a Pons sur Saine aprés le de
partement de messire Eustace d’Aubrechicourt
oirent les nouvelles de la prise messire
Eustace et la desconfiture, ilz n’eurent mie
conseil de tenir la forteresse car ilz n’estoient
que un pou de gens si trousserent et s’en
partirent. Et aussi firent ceulx de Trochi,
de Saponay, d’Arsi, de Mery, de Plansi et de
tous les fors qui appartenoient au dit
messire Eustace et les laissierent vagues
et se bouterent es autres fors mais
messire Pierre d’Audelee ne se party point
pour ce de Beaufort ne Jehan de Segure,
de Nogent ne Albrest de Gye sur Saine.
En ce temps se trespassa de ce siecle asséz
merveilleusement ou chastel de Herielle
a III lieues pres d’Amiens qu’il tenoit
messire Jehan de Piquegny et l’estrangla
son chambellan. Auques ainsi mouru
un chevalier de son conseil appellé
messire Lus de Bekesi, Dieux leur pardoint
leurs mauls. Un tel miracle avint d’un
escuier englois qui estoit de la route
messire Pierre d’Audelee et de Aelbrest.
Ilz avoient chevaucié un jour et estoient
entréz en un villaige qui s’appelle Ronay
et le desroberent les pillars. Et y entrerent
si a point que le prestre chantoit la grant
messe. Cil escuier entra en l’eglise et
vint a l’autel, si prist le galice ou le
prestre devoit consacrer le corps Nostre Sire
et getta le vin en voie. Et pour tant que
le prestre en parla, cil le fery de son gant
a treverse main si fort que le sang en
vola dessus l’autel. Quant ilz furent
yssuz de la ville et venuz aux champs,
cil escuier qui avoit fait cel oultrage
et qui portoit le galice, la plataine et
le corporal. Le cheval d’icellui commença
a tourner diversement et a demener
tel tempeste que nul ne l’osoit approuchier