l’autre sepmaine." Ainsi attendoient tous
ces seigneurs alemans, Miessenaires, Hes
begnons, Brebançons, Flamens et Henuiers,
povres et riches, le roy d’Engleterre des l’entree
d’aoust jusques a la Saint Luc car chascun
pensoit a avoir si grans bienfais de lui
et tant d’avoir gaingnier en France que
jamais ne seroit povre. A Calais estoient
a grans coustages et a grant dangier qu’il
couvint les plusieurs vendre la plus grant
partie de leurs joyaux. Et se le roy d’Engleterre
feust adont venuz ne arrivéz a Calais, il
ne sceust ou herbergier ne ses gens fors
ou chastel car le corps de la ville estoit
tout pris. Et si estoit on encore en doubte
que par aventure ces seigneurs qui tout
avoient despendu, ne se voulsissent
point partir de Calais pour roy ne pour
autre se on ne leur eust rendu tous leurs
despens de deniers appareilliés.
SHF 1-454 sync Le roy d’Engleterre, qui ne peut avoir
sitost ses gens ne ses pourveances
appareillees qu’il voulsist, et qui bien
avoit entendu le grant nombre de gens
qui l’attendoient a Calais pour avoir
grace et grans bienfais de lui combien
qu’il n’en eust mie mandé la quinte partie
de ceulx qui estoient la venuz, mais estoient
les aucuns venuz de leur voulenté pour
leur honneur avancier. Et les autres pour
convoitise de gaingnier et pillier sur le
bon paÿs et plentiveux royaume de France.
Si eut le roy d’Engleterre doubte de ce que dit
est et se avisa qu’il envoieroit son cousin
le duc de Lencastre a Calais pour lui ex
cuser. Lequel duc fist tant qu’il vint a
Calais environ la feste saint Remy a
tout IIIIC armeures de fer et IIM archiers
et Gallois. Si fu durement conjois et bien
venuz de ces seigneurs estrangiers qui
lui demanderent nouvelles du roy. Et
il l’escusa sagement envers eulx et fist
deschargier son harnois, ses chevaux et
ses pourveances. Puis dist a ces seigneurs
estrangiers que le sejourner la ne leur
valoit riens mais il vouloit chevaucier
en France pour veoir qu’il trouveroit. Si
leur pria qu’ilz voulsissent chevaucier
avec lui. Et il presteroit aucune somme