et paréz que c’estoit merveilles et grant
deduit au regarder les armes luisants,
les banieres ventellans, leurs conrois par
ordonnance, le petit pas chevauçant ne on
n’y sceust riens amender. Quant le duc de
Lencastre et ces seigneurs dessus nomméz par
furent venuz jusques au roy, il leur fist
moult grant feste et liement les salua et
les regratia humblement de leur service
et de ce qu’ilz estoient la venuz de leur bonne
voulenté. Tantost ces seigneur estrangiers,
Alemans, Messenaires, Braibançons et Behai
gnons et tout assembléz remoustrerent au
roy comment ilz avoient leur avoir despendu
leurs chevaux et harnois venduz, si que
pou ou neant leur estoit demouréz pour
lui servir ouquel nom ilz estoient venuz
la, ne n’avoient de quoy pour raler en leur
paÿs se besoing estoit. Si lui prierent que
par sa noblesce il y voulsist entendre. Le
roy se conseilla briefment tout a cheval
enmy les champs ou il estoit et leur dist
courtoisement ainsi : "Je ne sui mie bien
pourveu de respondre cy endroit pleinement
et vous estes durement traveilliés si comme
je pense, si vous aléz reposer et refreschir
II jours ou III dedens Calais. Et je m’en con
seilleray encore nuit et demain plus plei
nement et vous envoieray responce telle
qu’il vous devera souffire par raison et
selon mon pouoir." Et dont ces estranges
gens se partirent du roy et de la route du
duc de Lencastre et s’en alerent pardevers
Calais. Quant ilz eurent chevaucié en
viron demie lieue, ilz encontrerent moult
bel charroy et grant bien estoffé de toutes
pourveances. Aprés encontrerent le
prince de Galles noblement et richement
paréz d’armes et toutes ses gens qui estoient
si grant foison en son conroy que tout le
paÿs en estoit couvert. Et chevauçoient
tout le commun pas rengiés et serréz ainsi
que pour tantost combatre se mestier feust
toudiz une lieue ou deux ensuz de l’ost du
roy son pere. Si que leurs charrois et leurs
pourveances charioient toudiz entre leurs
deux ostz. Laquelle ordonnance ces seigneurs
estrangiers prisierent moult. pb 153 v