Online Froissart
Home  |  Navigate  |  Apparatus  |  Search  |  About the Edition  |  About the Project  |  Help
Facsimile mode    Settings    Browse  |  Collate      
Navigate | Close
Preferences
New York M804
Previous | Folio 168 v | Next
pb 168 v

Pin, Espiote, le Petit Meschin, Batillier, Hen
nequin François, le bourc Camuz, le bourc
de Lespare, Nandon de Bagerant, le bourc
de Bretueil, Lamitagre l’Escot, Abrest, Oury
l’Alemant, Borduelle, Bernart de la Sale,
Robert Briquet, Carsuelle, Aimemon d’Orige,
Garsiot du Chastel, Guionnet de Paus,
Hortings de la Salle et pluseurs autres. Si se
aviserent ces compaignons environ la My
Quaresme qu’ilz se trairoient vers Avignon
veoir le pape et les cardinaux. Puis entrerent
et coururent en la conté de Mascon pour
venir en la conté de Forés, le bon gras paÿs
et vers Lions sur le Rosne. SHF 1-492 sync Comment messire
Jaques de Bourbon ala contre les compaignes.
Le roy de France entendy ces nouvelles
que ces compaignes multiplioient
ainsi. Si en escript especialment devers son
cousin messire Jaques de Bourbon que se
tenoit adont en la ville de Montpellier et
lui mandoit qu’il se feist chief contre ces
compaignes et preist tant de gens d’armes
de tous costéz qu’il feust fort asséz pour eulx
combatre. Et dont messire Jaques s’avala
incontinent devers Avignon et envoioit
par tout lettres et messages en priant et
commandant les nobles chevaliers et escuiers
ou nom du roy qu’ilz se traissent devers
Lion sur le Rosne, ycellui messire Jaques
estoit bien amé ou royaume de France. Si
le suivoient chevaliers et escuiers d’Auvergne,
de Limosin, de Provence, de Savoie, de la
Dauphiné de Vienne et d’autre part de la
duchié et de la conté de Bourgoingne que
le joenne duc y envoioit. Si vint messire
Jaques en la conté de Forés, dont la contesse
de Forés sa suer estoit dame depar ses enfans
car le conte de Forés son mary estoit trespassé
nouvellement, et gouvernoit pour le temps
d’adont messire Regnaut de Forés frere au
dit conte, qui recueilla le dit messire Jaques
et ses gens liement. Et la estoient ses deux
nepveux et nepveux aussi a messire
Jaques a qui il les representa doucement
et messire Jaques les mist deléz lui pour
chevaucier et eulx armer pour aidier a
defendre leur paÿs car les compaignes
tiroient a venir celle part.

SHF 1-493 sync Quant ces routes et ces compaignes,
qui se tenoient vers Chalons sur la
Sone et environ Tourmis en ce bon gras
paÿs, entendirent que les François s’assem
bloient pour eulx combatre, si se trairent
les cappitaines a conseil et trouverent
qu’ilz estoient environ XVIM combatans uns
que autres, si distrent : "Nous yrons combatre
contre ces François a nostre avantage se nous
pouons, autrement non. S’aventure donne
que la fortune soit pour nous nous serons
tous riches et recouvréz pour un grant temps,
tant en bons prisonniers que nous prendrons
comme en ce que nous serons si redoubtéz
que nul ne se mettra contre nous. Et se nous
perdons nous serons paiéz de noz gaiges."
En ce propos se deslogierent pour entrer en
la conté de Forés et venir sur la riviere de
Loire. En leur chemin trouverent une bonne
ville appellee Chierleu, du bailliage de Mascon,
si l’assaillirentet rendirent grant paine
un jour tout entier mais elle estoit si bien
defendue des gentilzhommes du paÿs qui
la s’estoient retrais que riens ny conquistrent.
Oultre passerent parmy la terre monseigneur
de Beaugeu et y firent moult de mauls.
Et entrerent en l’archeveschié de Lions
et ainsi qu’ilz aloient et chevauçoient, ilz
prenoient petiz fors ou ilz se logierent.
Et a III lieues pres de Lions sur le Rosne
prindrent le chastel de Brinay, le seigneur
dedens et la dame. La se arresterent car
ilz entendirent que les François estoient
trais sur les champs et appareilliés pour
eulx combatre.
SHF 1-494 sync
Miniature

S’ensuit la bataille qui fu a Brinay a III
lieues pres de Lions sur le Rosne. pb 169 r