il ne sembloit mie bon a pluseurs que ce voiage
se feist jusques a tant que le royaume
feust en meilleur estat ou au moins que on
eust paix au roy de Navarre mais nul ne
pouoit brisier la devotion du roy de France
qu’il n’accordast et jurast au roy de Chipre
a estre a Marseille du mars qui venoit en
I an que on compteroit l’an mil IIIC LXIIII.
Et que adont passeroit et livreroit pourve
ances a tous ceulx qui passer vouldroient.
Sur ce, se party le roy de Chipre du roy de
France et pour ce qu’il avoit bon terme
encore de retraire en son paÿs et de faire
ses pourveances, il yssi de Paris en grant
arroy et fist tant qu’il vint a Rouen. L’arce
vesque de Rouen messire Jehan d’Alençon
le reçut grandement et le tint deléz lui moult
aisiement III jours. Au IIIIe le roy se party
du dit arcevesque qui estoit son cousin et
prist le chemin de Caen. Si passa les guéz
Saint Climent et vint en la forte ville de
Chierbourc. La trouva le roy de Navarre
et messire Loÿs son frere a bien petit de
gens, lesquelx le recueillierent et festoierent
honnorablement. Le terme que le roy de
Cipre se tenoit deléz eulx, il s’avança de
traittier de paix entre ces II seigneurs
d’une part et le roy de France d’autre part.
Et en parla pluseurs fois moult ordonneement
car il estoit de grant aviz et beau langaige
et moult améz. A toutes ses parolles
respondirent ces seigneurs de Navarre ses
cousins moult gracieusement et s’excu
soient en ce que n’estoit point leur coulpe
qu’ilz n’estoient bons amiz au roy de France
et au royaume car grant desir avoient
de l’estre mais que on leur rendist leur
heritage que on leur detenoit a tort. Le
roy de Chipre eust voulentiers veü qu’ilz
s’en feussent miz sur lui mais quant il
vit qu’il ne pourroit riens faire, il prist
congié d’eulx quant il eut la sejourné
XV jours. Si vint a Caen, puis passa
Saine au Pont de l’Arche. Aprés entra en
Pontieu et passa la riviere de Somme
a Abbeville, de la vint a Rue, a Monstruel
et a Calais ou il trouva III ducs les ducs
d’Orleans, de Berry et de Bourbon car le duc
d’Anjou estoit retournéz en France, je ne