En celle propre sepmaine arriva
le Captal de Beus ou havene de
Chierbourc a bien IIIIC hommes d’armes.
Si lui fist le roy de Navarre grant feste
et se complaingnoit de ce que on lui avoit
emblé ses villes de Mante et de Meulent
et que les François se mettoient en paine
tous les jours de lui tolir le demourant.
Le Captal dist : "Monseigneur, s’il plaist a Dieu nous
yrons au devant et exploiterons telement
que vous les raréz et encore des autres. On
dist que le roy de France yra temprement
a son sacré a Rains. Si yrons a l’encontre et
lui porterons ennuy." Et dont le roy de Navarre
manda gens partout ou il les peut avoir.
Adont estoit en Normandie sur la marine
un chevalier d’Engleterre appellé messire
Jehan Joyel qui autrefois s’estoit armé pour
le roy de Navarre et tenoit toudiz en sa
route IIC ou IIIC appers combatans, le
roy de Navarre lui pria par lettres qu’il le
voulsist venir servir et il lui remeriroit
grandement. Et messire Jehan Jouel vint
tantost a lui et se mist du tout en son
service. Bien estoit enformé le duc de
Normandie comment le roy de Navarre faisoit
son amas de gens d’armes. Si se pourvei
selon ce et escript a messire Bertran Claquin
que il et ses Bretons feissent frontiere et
se meissent aux champs contre Navarrois.
Et messire Boucicaut demourast en la
ville de Mante pour garder Mante et
Meulent. Ainsi fu fait. Si se parti messire
Bertran de Mante et se mist aux champs
pardevers Vernon. En briefs jours envoia
le duc de Normandie devers lui grans gens
d’armes en pluseurs routes, le conte d’Aucerre,
le viconte de Biaumont, le seigneur de Beau
geu, messire Loÿs de Chalons, messire l’Arche
prestre, le maistre des arbalestiers et pluseurs
bons chevaliers et escuiers. En ce temps
estoient yssuz de Gascoingne et venuz en
France devers le duc de Normandie pour
lui servir le sire de Labrech, messire Aimemon
de Pumiers, messire Petiton de Courton, messire
le Souduich de l’Estrade et pluseurs autres chevaliers
et escuiers dont le dit duc leur savoit grant
gre et leur donna tantost grans gaiges et pb 174 v