voulenté du duc tous les François qui
dedens estoient. Et donna le duc le chas
tel de Preux a un chevalier de Beausse que
on appelloit messire Pierre du Boys Ruffin.
Cil le fist reparer et mettre bien a point
et le garda toudiz puis bien souffisaument.
Aprés mena le duc refreschir ses gens
dedens la cité de Chartres. Quant il eut
la esté V jours, il se trait devant le chas
tel de Connay et l’assegierent de tous poins.
Ceste garnison de Connay avoit fait
moult de destourbiers ou paÿs d’environ,
si dist bien le duc qu’il ne s’en partiroit
sans prendre. Et avoit fait drecier VI
grans engins qui gettoient onniement.
Quant ceulx de Connay virent qu’ilz
estoient ainsi traveilliés, si se feussent
voulentiers rendu sauf leurs corps et
leurs biens mais le duc n’y vouloit
entendre s’ilz ne se rendoient simplement.
Endementiers que ces chevauciees
et prises se faisoient en Beausse et en
Normandie, couroient d’autre part
messire Loÿs de Navarre et ses compaignons
en la basse Auvergne et en Berry et y
tenoient les champs. Et honnissoient
durement le paÿs ne nul n’aloit au
devant. Et aussi ceulx de la Charité
faisoient autour d’eulx ce qu’ilz vouloient
dont les complaintes en venoient
tous les jours au roy de France. D’autre
part, le conte de Montbliar avec aucuns
aliés d’Alemaigne estoient entréz en la
duchié de Bourgoingne pardevers
Besançon et y apovrissoient aussi tout
le paÿs. Par quoy le roy de France
manda au duc de Bourgoingne qu’il
se retraist devers Paris car il lui
couvenoit aler en son paÿs. Et dont
le duc laissa partir ceulx du chastel
de Connay sauf leurs corps et biens.
Si delivra le duc le chastel a un
escuier de Beausse qui s’appelloit Phelippe
d’Arcies. Cil le repara bien et bel et
le refreschi de bons compaignons. Ce
fait, le duc revint a Chartres. La
recharga la plus grant partie de ses
gens au conte d’Auçuerre, au mareschal
Bouciquaut et a messire Loÿs de Sauterre.