The Online Froissart

Facsimile mode Settings Browse | Collate

pb 207 r

afaire de lui. Et avoit par recepte toute
sa maladie, si le jugoient les medicins
et cirurgiens de France plain de ydropisie
et de malaide incurable. Asséz tost aprés
la prise de messire Caponnet Caponnal et du
clerc de droit qui furent pris et arrestéz par
monseigneur Guillaume le Monne et menéz prison
niers en la cité d’Agen, si comme cy dessus
est dit, le conte de Pierregorth, le conte de
Commines et le viconte de Carmaing avec
messire Bertrain de Tharide, le seigneur de
la Barde et le seigneur de Pincornet qui
se tenoient en leurs terres prenoient en
grant despit la prise d’iceulx messagiers
car ou nom d’eulx et pour eulx ilz avoient
eu ce dommage. Si entendirent que messire
Thomas de Welkesare devoit chevaucier a
Rodais pour entendre a la forteresce et se
tenoit a Ville Neufve d’Aginois. Et dont
les dessus dis se mistrent en embusche si
que au dehors de Montalban environ trois
lieues ainsi que le dit seneschal de Roergue
chevauçoit a LX lances et IIC archiers.
L’embusche des Gascoings qui estoit de
IIIC lances leur sailli au devant dont
les Englois furent esbahiz. Touteffois se
mistrent a defence bien et faiticement
mais les François qui estoient pourveuz
de leur fait les envahirent si fierement
que de premier encontre ilz en ruerent
foison par terre et ne peurent les Englois
porter le fes, si se ouvrirent et desconfirent
et tournerent les dos. La en eut plenté
de mors et pris messire Thomas Welkefare
se sauva en la forteresce de Montalban par
la bonté de son coursier. Et les dis François
emmenerent leurs prisonniers en leur
paÿs et leur conquest. Quant le prince
de Galles oy ces nouvelles, il escript tantost
devers messire Jehan Chandos qui se tenoit
en Constantin a Saint Sauveur le Viconte
en lui mandant que ses lettres veues il
se traist sans delay avant. Et dont messire
Jehan le plus tost qu’il peut vint en Angou
lesme devers son seigneur qui tantost l’envoia
a grant foison de gens d’armes et d’archiers
en la ville de Montalban pour la tenir
frontiere contre les Gascoings, François qui
multiplioient tous les jours et couroient
sur la terre du prince. Le dit messire Thomas

de Welkesare seneschal de Roergue se recueilla
au mieulx qu’il peut et vint a Rodais. Et
pourvei et refreschi grandement la cité
et aussi la ville et le chastel de Lamilau sur
les marches de Monpellier et toutes les
garnisons de sa seneschaucee et le fort
chastel de Montpesier et par tout mist gens
d’armes et archiers. Messire Jehan Chandos
qui se tenoit a Montalban tint la franchement
la marche et la frontiere contre les François
avec les chevaliers que le prince y envoia
tel que messire le Captal de Beus, les II freres
de Pumiers messire Jehan et messire Helie,
le Soudich de l’Estrade, le sire de Partenay, le
sire de Pons, messire Loÿs de Harecourt, le sire
de Puiane, le sire de Tannaibouton et messire
Richart de Pontchardon. Si faisoient souvent
des yssues ces chevaliers et leurs routes
sur les gens du conte d’Armignach et le
sire de Labreth qui faisoient aussi la
frontiere et le conte de Pierregort et les
autres dessus dis tous d’une aliance. Si
gaignoient une fois les uns et puis les
autres. Encore se tenoit le duc d’Angiers
tout quoy car le roy de France lui avoit
defendu qu’il ne feist point de guerre au
prince jusques a tant qu’il aroit de lui
certaines nouvelles. SHF 1-609 sync Comment le roy
de France deffia le roy d’Engleterre.
Le roy de France toute celle saison
secretement et soutivement avoit
retrais pluseurs cappitaines des compaignes,
Gascoings et autres qui s’estoient partiz
des Englois et montéz contremont Loire
sur les marches de Berry et d’Auvergne.
Et les consentoit la le roy de France a vivre
et demourer mais point ne se nommoient
encore ces compaignes françois car le roy
de France n’en vouloit mie estre nommé par quoy
il perdist son fait de la conté de Pontieu qu’il
tendoit fort au ravoir. Car se le roy d’Engleterre
sentist que le roy de France lui voulsist
avoir fait guerre, il eut bien pourveu au
dommage qu’il reçut de Pontieu car il
eut si grossement pourveu la bonne ville
d’Abbeville d’Englois et de gens depar lui
qu’ilz en eussent esté maistre et de toutes
les garnisons appendans de la dicte conté.
A ce dont estoit seneschal de Pontieu depar
le roy d’Engleterre un bon chevalier englois pb 207 v

Display By:	Folio Manuscript Chapter SHF Chapter

Manuscript:
Navigate By:	Folios Manuscript Chapters Edition Chapters Printed Editions
Go To:

Return to Manuscript

Facsimile	Manuscripts are displayed with a layout and visual style which reflects the original manuscript as closely as possible.
Edition	Manuscripts are displayed in a more readable style resembling a modern edition.
Synchronise by word	Every collated word becomes a link. Clicking on a word will synchronise all open manuscripts to that word.
DMF	With this setting, every word becomes a link to the online Dictionnaire du Moyen Français (DMF). Clicking on a word opens a window listing relevant entries on the DMF website.

Horizontal	Viewing windows extend horizontally across the page.
Vertical	Viewing windows extend vertically down the page.