The Online Froissart

Facsimile mode Settings Browse | Collate

pb 23 r

Pourquoy je ne faudray mie a mon chier
et ainsné filz le roy d’Engleterre, s’il treuve
en son conseil qu’il le vueille entreprendre,
ains lui aideray de conseil et d’aide a mon
loyal pouoir. Aussi fera Jehan, mon frere,
qui la siet, qui autrefois l’a servi. Mais
sachiés qu’il y fauroit bien avoir autre aide
plus forte que n’est la nostre car Henau est un
petit paÿs au regart du royaume de France
et Engleterre en gist trop loing pour nous
secourre." "Certes, sire, vous nous donnéz tres
bon conseil et nous moustréz grant amour
et grant voulenté, de quoy nous vous regra
tions depar nostre seigneur le roy." Ce respondy l’evesque
de Lincolle pour tous les autres et dist encore :
"Chier sire, or nous conseilliés desquelz seigneurs
nostre seigneur se pourroit mieux aidier et esquelz
il se pourroit mieux fier par quoy nous
lui puissons raporter vostre conseil." "Sur
l’ame de moy," respondy le conte, "je ne saroie
aviser seigneur si puissant pour lui aidier
en ses besoingnes comme seroit le duc de Bre
bant, qui est son cousin germain, aussi l’e
vesque du Liege, le duc de Guerles, qui a
sa suer a femme, l’arcevesque de Couloingne,
le marquis de Julliers, mesire Ernoul de Kake
hen et le sire de Franquemont. Ce sont ceulz
qui plus aroient grant foison de gens
d’armes en brief temps que seigneur que
je sache en nul paÿs du monde et si sont
tresbons guerroieurs et fineroient bien
se ilz veulent de VIIIM ou de XM armeures
de fer mais que on leur donne de l’argent
a l’avenant et si sont seigneurs et gens qui
gaingnent voulentiers. S’il estoit ainsi que
le roy mon filz et vostre seigneur eust acquiz
ces seigneurs que je diz et il feust pardeça
la mer, il pourroit bien aler requerre le
roy Phelippe oultre la riviere d’Oise et combatre
a lui." Ce conseil plot grandement a ces
seigneurs d’Engleterre. Puis pristrent congié
au conte de Henaut et a mesire Jehan, son frere,
si s’en ralerent vers Engleterre porter au
roy le conseil qu’ilz avoient trouvé ou
dessus dit conte et a son frere. Quant ilz
furent venuz a Londres le roy leur fist grant
feste et ilz lui raconterent tout ce qu’ilz lui
avoient trouvé au conseil et a l’avis du
gentil conte de Hainau et de monseigneur Jehan,
son frere. Dont le roy ot grant joie et en fu

grandement reconforté quant il ot tout
entendu ce que son sire lui ot mandé et
conseillié. Or vindrent ces nouvelles en
France et multiplierent petit a petit que
le roy englois supposoit et entendoit a
avoir grant droit a la couronne de France
et fu le roy Phelippe enformé et avisé de ses plus
especiaux et grans amis que s’il aloit ou
voiage d’oultemer qu’il avoit empris, il
mettroit son royaume en tres grant aven
ture et qu’il ne pouoit faire ne exploitier
meilleur paine que a garder ses gens et
ce qui sien estoit et dont il tenoit la posses
sion et qui devoit retourner a ses enfans.
Si se refroida grandement de celle crois
emprise et preschiee et contremanda ses
officiers qui ses pourveances faisoient
si grandes et si grosses que merveilles,
jusques a tant qu’il aroit veü de quel pié
le roy d’Engleterre vouloit aler avant, qui pas
ne se refroidoit de lui pourveoir et appareillier
selon le conseil que ses hommes lui avoient
rapportéz du conte de Henaut. Et fist asséz
tost aprés ce qu’ilz furent revenuz en
Engleterre ordonner et appareillier dix
chevaliers baneréz et XL autres chevaliers,
joennes bachelers et les envoia a grans
frais pardeça la mer droit a Valenchiennes
et l’evesque de Lincolle, qui fu moult vaillans
homs avec eulz, en cause que pour traittier
a ces seigneurs de l’Empire que le conte de
Henau leur avoit denomméz et pour faire
tout ce qu’il et messire Jehan en conseilleroient.
Quant ilz furent venuz a Valenchiennes,
chascun les regardoit a grant estat qu’ilz
maintenoient sans espargnier neant plus
que se le corps du roy d’Engleterre y fust
en propre personne, dont ilz acquiroient
grant grace et grant renommee. Et si y
avoit entr’eulx pluseurs bachelers qui
avoient chascun I oeil couvert de drap pour
quoy ilz n’en pouoient veoir. Et disoit on
que ceulx avoient voué entre dames a leur
paÿs que jamais ne verroient que d’un
oeil jusques a tant qu’ilz aroient fait aucunes
proesces de leurs corps ou royaume de France.
Lesquelx ilz n’en vouloient mie congnoistre
a ceulx qui leur en demandoient, si en avoit
chascun grant merveille. Quant ilz furent
asséz festoiéz et honnoréz a Valenchiennes pb 23 v

Display By:	Folio Manuscript Chapter SHF Chapter

Manuscript:
Navigate By:	Folios Manuscript Chapters Edition Chapters Printed Editions
Go To:

Return to Manuscript

Facsimile	Manuscripts are displayed with a layout and visual style which reflects the original manuscript as closely as possible.
Edition	Manuscripts are displayed in a more readable style resembling a modern edition.
Synchronise by word	Every collated word becomes a link. Clicking on a word will synchronise all open manuscripts to that word.
DMF	With this setting, every word becomes a link to the online Dictionnaire du Moyen Français (DMF). Clicking on a word opens a window listing relevant entries on the DMF website.

Horizontal	Viewing windows extend horizontally across the page.
Vertical	Viewing windows extend vertically down the page.