SHF 1A-718 sync Comment le duc de Bretaigne estoit
englois et son paÿs françois.
Le duc de Bretaigne, qui en ce temps
se tenoit asséz paisiblement en
son paÿs, si estoit moult courroucié du
dommage des Englois car si comme il
disoit tel qu’il estoit le roy d’Engleterre
et sa puissance l’avoient fait ne de lui
n’eust riens esté, se le roy englois ne feust
qui tousjours avoit guerroie pour lui et
presté gens or et argent et avoit eu sa
fille en mariage. Et voulentiers eust veü
le duc que son paÿs eust esté de la partie
du roy d’Engleterre mais tous les barons, chevaliers
et escuiers de Bretaigne estoient tresbons
François. Et par especial les seigneurs
de Cliçon et de Laval, le viconte de Rohen
qui pour le temps estoient les plus
grans chiefs en Bretaigne. Et distrent
bien les dis seigneurs au duc : "Chier sire, si
tost que nous pourrons apparcevoir que
vous feréz partie pour le roy d’Engleterre
contre le roy de France nostre souverain
seigneur, nous vous relengquirons tous
et mettrons hors de Bretaigne." Touteffois
le duc ne pouoit son courage courir
ains disoit que on faisoit grant tort au
roy d’Engleterre et se descouvri et parla
moult avant a aucuns seigneurs
de Bretaigne. Le roy de France qui avoit
atrait a lui le cuer et l’amour de
tous les chevaliers de Bretaigne ex
cepté monseigneur Robert Canolle prioit que
s’ilz veoient nulles defaites ou duc qu’ilz
lui laissassent savoir et il y pourverroit
de remede. Le duc s’apparçut que ses gens
le souppeconnoient et mettoient grant
regart sur lui, si se doubta qu’ilz ne le
preissent et envoiassent a Paris. Lors
signifia une partie de son estat au roy
d’Engleterre et lui pria qu’il lui voulsist envoier
gens d’armes couvertement pour lui
aidier, se mestier estoit le roy lui envoia
le seigneur de Nuefville a IIIIC combatans
et autant d’archiers. Lesquelx vindrent
arriver a Saint Mahieu de Fine Posterne.
Et la se tindrent en la ville sans faire
dommage ne contraire au paÿs mais
paioient bien tout ce qu’ilz y prenoient