devant Biecerel et l’autre devant Derval
et aussi ne cuidoit mie que le conte de
Salebrin deust la venir si fort qu’il fist.
Si se party de la marche de Nantes quant
la journee de rendre Brest deut approchier,
mais il ne vint point jusques la car il
entendy que les Englois estoient la venu
fort asséz pour combatre. Si voult ouvrer
de ceste besongne par grant advis ainsi
qu’il fist et se tint tout quoy sur la place
sans point traire avant. Et fu la VII jours
ou environ. Quant le conte de Salebrin,
qui se tenoit devant Brest et avoit aussi
pris la place grandement a son avantage,
vit que le connestable de France et les
Bretons ne traioient point avant, il
envoia un heraut qui vint devers messire
Bertrain Claquin, si l’enclina et salua.
Puis dist : "Monseigneur, je sui cy envoie depar
monseigneur le conte de Salebrin et les seigneurs
d’Engleterre qui vous signifient par moy
qui sui leur heraut d’armes et leur varlet
comme ainsi soit que de longtemps vous
ayés assegié la ville et le chastel de Brest,
mes seigneurs et mes maistres ont
entendu que certains traittiés et com
positions de rendre la forteresse est
mis avant s’il n’est secouru et conforte
dedens le jour qui n’est mie trop loingtain.
Si vueilliés savoir qu’ilz sont trait devant
Brest en voulenté de tenir leur journee de
garder la forteresse. Si vous mandent
et prient que vous vueilliés traire avant
et vous seréz combatu sans faulte, ou
se ce ne vouléz faire et point ne le
trouvéz en vostre conseil, si leur renvoie
leurs hostaiges." Lors dist le connestable :
"Heraut, vous nous aportéz bonnes nou
velles et vous soyéz le bien venu. Vous
diréz a voz maistres depar nous que
nous avons aussi grant desir ou plus
d’eulx combatre qu’ilz ont nous, mais
ilz ne sont mie en lieu ne en place
ou le traittié fu premierement pourparle
et accorde si leur dictes qu’ilz se traient
celle part et sans faulte ilz seront combatu."
Adont le heraut retourna devant
Brest a ses maistres, lesquelx le ren
voierent tantost devers le connestable.
Auquel il dist : "Monseigneur, je vien de mes seigneurs