The Online Froissart

Facsimile mode Settings Browse | Collate

pb 248 v

leurs banieres et leurs pennons. Quant
les Englois virent celle grosse route si
pres d’eulx, si s’arresterent et eurent avis
d’envoier a l’ost qui estoit bien ensuz une
grosse lieue mais messire Gautier Hue qui
estoit un grant cappitaine englois estoit
logiés asséz pres de la ou la besongne avint.
Si tost qu’il en fu avisé, il monta a cheval
en si grant haste la lance ou poing sans
bacinet et sans visiere une cote de fer avoit
vescue tant seulement et chevauça celle
part sans avis ne conseil. Ses gens le sui
voient qui mieux mieux. Si eut en l’estour
le col percié d’un glaive tout oultre et chey
mort. Les Englois se combatoient moult
vaillemment mais finablement ilz furent
mors ou pris. Petit s’en sauverent. La furent
pris des chevaliers englois messeigneurs
Jehan Rademan, Thomas Fouque, Hue Brunel,
Thomas le Despensier, Thomas le Breton,
Nicole Gascoing, Jehan Candely, Hue Harpe
danne, Leonniel d’Autrui et Phelippe Cambery.
Et des escuiers Jehan Gaillart, Thomas
Brudelay, Henry Mainefort, Guion de
Chrier, Guillaume d’Autrui, Jehan Menet,
Antequin, Thomas Robinet, Jehan Wandequin,
Thomas Clement, Guillaume Gansul, Jehan
de Foubert, Thomelin Solerant, Guillaume
Quintenier, Robin Bouchelle, Robert d’Audelay,
Raoul d’Estambi et Thomas Artus. Les
nouvelles vindrent en l’ost des Englois
que leurs compaignons se combatoient,
lors se hasterent les mareschaux et tout
l’ost de venir celle part, mais ilz ne se
sceurent tant avancier que la chose ne
feust passee. Et estoient les Bourguignons
et François retrais es boys, si ne les sceurent
les Englois quel part querir. Ainsi ala de
cel encontre si comme je fu enformé qui
fu asséz pres de Douchi léz Soissons, le
IXe jour de septembre, l’an mil IIIC LXXIII.
Aprés ces II avenues de Ribeumont et
de Douchi n’avindrent au duc de Lencastre
ne a ses gens nulle aventure ou regne
de France en ce voiage qui a recorder face.
Si passerent ilz par maint passage et destroit
mais ilz chevauçoient saigement et se
tenoient ensemble car le conseil du roy
disoit ainsi : "Laissiés les aler et venir. Par

fumiers ne pevent ilz venir a vostre heri
taige. Il leur ennvira et yront tout a
neant quoyque un orage et tempeste appert
a la fois en I paÿs, il se depart puis et
degaste de soy meismes. Ainsi avenra il
de ces gens englois".
SHF 1A-742 sync Des hostages qui furent decoléz a
Derval en Bretaigne.
Vous avéz bien oy cy dessus recorder
comment messire Robert Canolle
estoit venuz en son chastel de Derval
qu’il tenoit pour son heritaige et vouloit
brisier et vouloit brisier le traitié qui
estoit fait entre ses gens et le duc d’Anjou.
Pourquoy le duc estoit venuz a siege
devant Derval et y seoient adont grant
foison de seigneurs en sa compaignie de
Bretaigne, d’Anjou, de Touraine, de Poitou
et des basses marches. Or voulsist bien
le roy de France que son connestable qui
la estoit et le sire de Cliçon et pluseurs autres
feussent en France pour aidier a pour
suivir les Englois avec son frere le duc
de Bourgoingne, si leur mandoit souvent
si que ces seigneurs se prenoient
pres d’eulx acquitter d’obeir au roy et
avoir la saisine du fort chastel de Derval.
Quant le jour fu passéz que le chastel
devoit estre rendu se le siege n’estoit levé,
si furent ceulx du siege tous esmserveilliés
a quoy ceulx dedens pensoient. Bien
savoient que messire Robert Canolle si
estoit miz et les avoit rafreschiz, s’y
envoierent les dis duc et connestable
leur heraut devers monseigneur Robert et
messire Hue Broe lequel avoit fait le
traittié. Quant le heraut fu venu en
la forteresse il dist : "Seigneurs, mes seigneurs
m’envoient cy pardevers vous comme
ceulx qui s’aroient voulentiers pourquoy
vous n’aquittéz voz hostages et delivréz
ce chastel ainsi que couvent se porte
et que vous messire Hue l’avéz juré." Adont
dist messire Robert : "Heraut, vous diréz a
voz maistres que mes gens ne pevent
faire nulle composition sans moy." Le
heraut quant il vit que messire Robert
ne vouloit tenir le traittié, de ses gens
retourna et le recorda a ses seigneurs pb 249 r

Display By:	Folio Manuscript Chapter SHF Chapter

Manuscript:
Navigate By:	Folios Manuscript Chapters Edition Chapters Printed Editions
Go To:

Return to Manuscript

Facsimile	Manuscripts are displayed with a layout and visual style which reflects the original manuscript as closely as possible.
Edition	Manuscripts are displayed in a more readable style resembling a modern edition.
Synchronise by word	Every collated word becomes a link. Clicking on a word will synchronise all open manuscripts to that word.
DMF	With this setting, every word becomes a link to the online Dictionnaire du Moyen Français (DMF). Clicking on a word opens a window listing relevant entries on the DMF website.

Horizontal	Viewing windows extend horizontally across the page.
Vertical	Viewing windows extend vertically down the page.