The Online Froissart

Facsimile mode Settings Browse | Collate

pb 27 v

bon confort. Car bien veoit le roy de France
et ooit dire tous les jours que le roy
d’Engleterre s’appareilloit quanqu’il
pouoit, siques quant le roy d’Escoce lui
ot remoustré sa besoingne et neccessité
et en quelle instance ilz estoit. La venus
il fu tantost tout acointié de lui. Car
moult bien se savoit acointrer de ceulx
dont il esperoit avoir prouffit ainsi que
pluseurs grans seigneurs scevent faire.
Si lui presenta ses chasteaux pour sejourner
a sa voulenté et de son avoir pour despendre
mais qu’il ne voulsist faire nul acord
ne paix au roy anglois fors par son
conseil. Le joenne roy d’Escoce reçut en grant
gre ce que le roy de France lui offri et
lui creança tout ce qu’il lui requist. Si
sembla adont au roy de France que c’estoit
grant confort pour lui et grant contraire
pour le roy d’Engleterre, s’il pouoit tant faire
que les seigneurs et les barons qui estoient
demouréz en Escoce, voulsissent et peussent
si ensonnier les Englois qu’il ne peust venir
deça la mer se petit non pour lui grever
ou qu’il couvenist le roy d’Engleterre retourner
pour garder son royaume. Pour ce et en
celle intention il retint ce joenne roy
d’Escoce et la royne sa femme deléz lui et
les soustint par longtemps et leur fist
delivrer quanqu’il leur besoingnoit car
d’Escoce leur venoit il asséz petit pour
leur estat maintenir. Et envoia le dit
roy de France grans messages en Escoce
a ces seigneurs et a ces barons qui la
guerroioient contre les garnisons du
roy d’Engleterre et leur fist offrir grant aide
et grant confort mais qu’ilz ne voulsissent
faire paix ne donner nulles treves aux
Englois se ce n’estoit par sa voulenté et
par son conseil et par la voulenté et
conseil leur seigneur le roy d’Escoce, qui
tout ce lui avoit promis et juré a tenir.
Sur les lettres et requestes du roy de
France ces seigneurs d’Escoce se conseillierent.
Quant ilz furent bien conseilliés et ilz
orent consideré parfaitement toutes
leurs besoingnes et la dure guerre qu’il
avoient aux Englois, ilz s’i accorderent
liement et le jurerent et seellerent avec

le roy leur seigneur. Ainsi furent les aliances
de ce temps faites entre le roy Phelippe
de France et le roy David d’Escoce, qui se
tindrent fermes et estables un longtemps.
Et envoia le dit roy de France gens d’ar
mes en Escoce pour guerroier les Englois
et par especial mesire Arnoul d’Andrehen,
qui puis fu mareschal de France, et le
sire de Garencieres avec pluseurs chevaliers et
escuiers y furent envoyés et y firent
mainte belle appertise d’armes si comme
vous orréz avant en l’istoire. Or me
tairay a present de ceste matiere et me
retrairay a nostre matiere devant.
SHF 1-70 sync Comment le roy Edouart fu fait vicaire
de l’empire d’Alemaigne.
Quant le roy Edouart et les autres
seigneurs a lui aliéz se furent
partis du parlement, si comme vous avéz
oy, le roy se trait a Louvaing et fist
appareillier le chastel pour demourer
et manda a la royne Phelippe sa femme s’elle
vouloit venir pardeça la mer ce lui
plairoit bien, car il ne pouoit de la re
passer toute celle annee. Et envoia grant
partie de chevaliers oultre pour garder
son paÿs meismement sus la marche
d’Escoce. La royne dessus dicte prist en
grant plaisance les nouvelles du roy
son seigneur si se appareilla au mieux
et au plus tost qu’elle pot pour repasser
la mer. Endementiers que ces besoignes
se detrioient les autres chevaliers englois qui
estoient en Braibant deléz le roy s’espar
dirent aval le paÿs de Flandres et de
Hainau en tenant grant estat et en
faisant grans frais. Et n’espargnoient
ne or ne argent non plus que se il
leur pluist des nués et donnoient
grans joiaux aux seigneurs, aux
dames et aux damoiseles pour acquerre
la grace et la loenge de ceulx et de celles
entre qui il conversoient et tant fai
soient qu’ilz l’avoient et estoient prisiés
de tous et de toutes et meismement
du commun peuple a qui ilz ne donnoient
riens, pour le bel estat qu’il menoient.
Or revindrent de l’empereur monseigneur
Loÿs de Baviere environ la Toussainc, pb 28 r

Display By:	Folio Manuscript Chapter SHF Chapter

Manuscript:
Navigate By:	Folios Manuscript Chapters Edition Chapters Printed Editions
Go To:

Return to Manuscript

Facsimile	Manuscripts are displayed with a layout and visual style which reflects the original manuscript as closely as possible.
Edition	Manuscripts are displayed in a more readable style resembling a modern edition.
Synchronise by word	Every collated word becomes a link. Clicking on a word will synchronise all open manuscripts to that word.
DMF	With this setting, every word becomes a link to the online Dictionnaire du Moyen Français (DMF). Clicking on a word opens a window listing relevant entries on the DMF website.

Horizontal	Viewing windows extend horizontally across the page.
Vertical	Viewing windows extend vertically down the page.