grant chevalerie de France, de Bre
taigne et de Savoie et entrerent
en la marche de Naples. Oncques
ceulx de Naples ne daignierent
clorre porte de leur ville, car qui
seroit dedens enclos quelque peuple
que ce feust, il seroit perdu. Ne
les maisons ne sont pas a prendre,
car il y a planches que on oste
quant on veult et la desoubz est
la mer ou nul ne s’oseroit embatre.
Avint que un enchanteur maistre
de nigromance qui longuement
avoit conversé en ce paÿs, vint
au duc d’Anjou et lui dist : "Monsigneur,
se vous vouléz, je vous rendray
le chastel de l’Uef, car je feray par
enchantement l’air si espés que
dessus la mer il semblera a ceulx
de dedens qu’il y ait un grant
pont pour aler X hommes de front
si doubteront ceulx dedens que se
on les assault qu’ilz ne soient
pris, si se venront rendre a vostre
voulenté." Adont lui demanda
le duc et dist : "Beau maistre, et
sur ce pont y pourroient noz
gens aler seurement pour assaillir ?"
L’enchanteur dist : "De ce ne vous
oseroie asseurer, car se aucun de
ceulx qui y passeroient feïst le
signe de la croix, tout yroit a
neant et ceulx qui seroient sus
trebucheroient en la mer." La
furent plusieurs joennes chevaliers
qui distrent au duc : "Pour Dieu,
laissiés le faire, car plus legie
rement ne pouons nous avoir