The Online Froissart

Facsimile mode Settings Browse | Collate

pb 36 v

desiroient ces chevaliers et ces soudoiers
depar le roy de France autre chose que ilz
peussent courir en Hainau pour pillier
et gaingnier et pour le paÿs mettre en
guerre. Aussi l’evesque de Cambray, mesire
Guillaume d’Ausonne, y rendoit grant paine
et estoit tout quoy a Paris deléz le roy Phelippe
et se complaingnoit a lui quant il cheoit
a point trop amerement des Henuyers
et disoit que les Henuiers lui avoient
fais plus de mauls et de contraires, ars,
pillié et couru son paÿs plus que nul
autre. Si se porterent adont telement les
besoingnes et fu le roy si durement con
seillié sus son nepveu le conte de Henau
et sus ses gens, que les soudoiers de Cam
bresis orent congié et accort d’entrer en
Henau et de faire y aucune envaye et
chevaucee au dommage du paÿs. Quant
ces nouvelles furent venues a ceulz a
ceulz qui es garnisons de Cambresis, se
tenoient si en furent moult joieux et
mistrent sus une chevauciee de VIC ar
meures de fer et se partirent un samedy
aprés jour faillant de Cambray ceulx qui
ordonnéz y estoient. Et aussi a telle heure
ceulx de Malemaison, et se trouverent
tous sus les champs et vindrent en la
ville de Haspre, qui lors estoit une bonne
ville et grosse et bien fouchie mais point
n’estoit fermee, et si n’estoient les gens
en nulle doubte car on ne les avoit point
aviséz ne escriéz de nulle guerre si entrerent
les François dedens et trouverent les gens,
hommes et femmes, en leurs hostels, si les
pristrent a leur voulenté et tout le leur,
or et argent, draps et joyaux et leurs
bestes. Puis bouterent le feu en la ville et
l’ardirent si nettement qu riens n’y demora
fors les parvis. Pardedens Aspre a une prevosté
de noirs moines et grant edifice avec le
moustier, qui se tient de Saint Vaast d’Arras.
Si la pillierent les François et roberent
et puis bouterent le feu dedens et l’ardirent
moult vilainement. Quant ilz en orent
fait leur voulenté, si chargierent tout
leur pillage et chacierent tout devant
eulx et retournerent a Cambray. Ces
nouvelles firent tantost sceues a Valen
ciennes et proprement elles vindrent jusques

au conte Guillaume de Haynau, qui se dormoit
a son hostel qu’on dist a la Salle, si se leva et
vesti et arma moult appertement et fist resveillier
toutes ses gens, dont il n’avoit mie plenté
deléz lui, fors tant seulement son seneschal
monseigneur Girart de Werchin, monseigneur Henry
d’Antoing, mesire Henry de Husfalise, monseigneur
Thierry de Walecourt, le seigneur de Poitelles,
le seigneur de Floion et aucuns chevaliers
qui se tenoient deléz lui, ainsi que tous
gentilzhommes se tiennent voulentiers
entour leur seigneur mais ilz estoient
couchiés en leurs hostelz. Si ne furent
mie si tost appareilliés, ne montéz, ne arméz
que le conte fu car il n’attendy nullui,
ains s’en vint ou marchié de Valenchiennes
et fist sonner les cloches ou belfroy a volee.
Si s’estourmirent toutes gens et s’armerent
et suirent leur seigneur a effort, qui s’estoit
ja mis hors de la ville et chevauçoit roide
ment devers Haspre en grant voulenté
de trouver ses ennemiz. Quant il ot
chevaucié environ une lieue, nouvelles lui
vindrent qu’il se traveilloit en vain et que
les François estoient retrais. Adont se retray
le conte en l’abbaie de Fontenelles, qui estoit
asséz pres de la, ou madame sa mere de
mouroit, qui fu toute ensonniee de lui ra
paisier tant estoit eschauffé et aïré et disoit
bien que cestui harsin de Haspre il feroit
temprement chier comparer au royaume
de France. Sa dame de mere lui acordoit
tout et eust voulentiers de ceste mespreson
excusé son frere le roy de France mais le
conte n’y vouloit entendre. Mais dist : "Il
me fault regarder comment hastivement
je me puisse vengier de ce despit qu’on
m’a fait et autre tant ou plus ardoir en
France." Quant le conte ot esté une espace
a Fontenielles deléz madame sa mere, il
s’en party quant il ot pris congié et retourna
a Valenciennes et fist tantost lettres escripre par
tout aux chevaliers et aux prelas de son paÿs
pour avoir conseil comment il se pourroit
chevir de ceste avenue et mandoit par ses
lettres que tous fussent a Mons en Hainau
au certain jour qui assignéz y estoit. Ces
nouvelles s’espandirent parmi le paÿs
et les sçot moult tost mesire Jehan de Haynau,
qui se tenoit a Biaumont, pensant et pb 37 r

Display By:	Folio Manuscript Chapter SHF Chapter

Manuscript:
Navigate By:	Folios Manuscript Chapters Edition Chapters Printed Editions
Go To:

Return to Manuscript

Facsimile	Manuscripts are displayed with a layout and visual style which reflects the original manuscript as closely as possible.
Edition	Manuscripts are displayed in a more readable style resembling a modern edition.
Synchronise by word	Every collated word becomes a link. Clicking on a word will synchronise all open manuscripts to that word.
DMF	With this setting, every word becomes a link to the online Dictionnaire du Moyen Français (DMF). Clicking on a word opens a window listing relevant entries on the DMF website.

Horizontal	Viewing windows extend horizontally across the page.
Vertical	Viewing windows extend vertically down the page.