temps, lequel pappe getta une sentence et
un escommemement en Flandres si grant et
si horrible qu’il n’estoit nul prestre qui
osast celebrer le devin office, de quoy les
Flamens furent moult courrouciés et
envoierent complaintes grandes et grosses
du roy englois. Lequel pour eulx appaisier
leur manda que la premiere fois qu’il pas
seroit mer, il leur amenroit des prestres
de son paÿs qui leur chanteroient vousist
le pappe ou non. Car il estoit bien privilegié
de ce faire. Et parmi ce s’apaisierent les Flamens.
SHF 1-100 sync Quant le roy de France vit que par
nul pourchas il ne pouoit re
traire les Flamens de leur oppinion, si
manda a ceulx qu’il tenoit en garnison
a Tournay, a Lille, a Douay et es chasteaux
voisins qu’ilz foissent guerre aux Fla
mens et courussent en leur paÿs et
sans deport. Dont il avint que messire
Mathieu de Roye qui pour le temps se
tenoit dedens Tournay et mesire Mahieu de
Trie, mareschaux de France avec monseigneur
Godemar du Fay et pluseurs autres seigneurs
mistrent sus une chevaucee de M arme
ures de fer, tous bien montéz et CCC ar
balestiers tant de Tournay, de Lille que
de Douay et se partirent de la cité de Tournay
un soir aprés souper et chevaucierent
tant que sus le point du jour ilz vindrent
devant Courtray et acueillirent entour
souleil levant toute la proie de la environ.
et coururent les coureurs jusques aux
portes et occirent et mehaignierent au
cuns hommes qu’il trouvoient es fourbours
et puis s’en retournerent arriere et sans
dommage. Et mistrent ces gens d’armes
leur retour devers la riviere du Lis et
devers le Warneston, en acueillant et en
amenant devant eulx toute la proie qu’ilz
trouverent et encontrerent et ramenerent
ce jour en la cité de Tournay plus de XM
blanches bestes et bien autant que porceaux
que buefs que vaches et en fu la dicte cité un
pourveue et rafreschie pour un grant
temps et largement a vitailles. Ces nouvelles
qui ne furent mie plaisans aux Flamens
s’espardirent parmi Flandres. Si en fu
le paÿs durement esmuéz et troubléz et en