fait en nefs sur l’Escaut berfrois et atour
nemens d’assaut et venoient hurter et
escarmuchier pres que tous les jours a
ceulx de Tournay. S’en y avoit des navréz
des uns et des autres et se mettoient en
grant paine les Flamens de conquerre
et de dommagier Tournay tant avoient
pris la guerre en cuer. Et on dist et voir
est qu’il n’est si felonnesse guerre que de
voisins et d’amis. Entre les assauls que les
Flamens firent il en y ot un qui dura
un jour tout entier. La ot mainte grant
appertise faire car tous les seigneurs
et les chevaliers qui en Tournay estoient
furent en cel assaut. Et estoit le dit as
saut fait en nefs et en vaisseaux a ce
appareilliés de long temps pour ouvrir
et pour rompre les barrieres a la
posterne de l’arche mais elles furent
si bien defendues que les Flamens n’y
conquistrent riens. Ainçois y perdirent
une nef toute chargiee de gens dont il
en y ot plus de VIXX noyéz et retournerent
au soir tous lasséz et tous traveilliés.
SHF 1-122 sync Le siege durant et tenant devers
Tournay yssirent hors une mati
nee les soudoiers de Saint Amant dont il
en y avoit grant foison et vindrent a
Hanon qui se tient de Hainau, si ardirent
la ville et violerent l’abbaie et destruirent
le moustier et enmenerent et emporterent
devant eulx tout ce que mener et porter
porent et puis retournerent a Saint
Amant. Asséz tost aprés, se partirent les
soudoiers dessus dis et passerent le bois
de Saint Amant et vindrent jusques a
l’abbaie de Vicoingne pour l’ardoir et
essulier et en fussent venuz a leur entente.
Car ilz avoient fait un grant feu devant
la porte pour l’ardoir et abatre par force
mais un gentil abbé qui leans estoit pour
le temps y pourvey de grant remede.
Car quant il ot regardé le peril il
monta a cheval et party par derriere
et chevauça tous les boys a la couverte
et fist tant qu’il vint a Valenciennes si
requist au prevost de la ville et aux
juréz que on lui voulsist prester les
arbalestiers de la ville pour aidier a