The Online Froissart

Facsimile mode Settings Browse | Collate

pb 47 v

leur avenoient des belles aventures et
perilleuses. Desqueles ilz se partoient a
grant honneur par quoy on les doit bien
compter untre les preux et aussi fait on.
Si avint ou temps que le roy englois
estoit pardeça et guerrioit le royaume
de France et seoit devant Tournay que le
roy Phelippe envoia grans gens en
Escoce qui arriverent en la ville de Saint
Jehan. Et prioit adont le roy Phelippe a ces
dessus nomméz d’Escoce qu’ilz voulsissent
esmouvoir et faire si grant guerre sur
le royaume d’Engleterre qu’il couvenist
que le roy englois s’en ralast oultre et defeist
son siege de devant Tournay et leur promist
a aidier de puissance de gens et d’avoir.
Si que en ce temps que ce siege fu devant
Tournay, ces seigneurs d’Escoce se pour
veirent a la requeste du roy de France
pour faire vue grande chevauciee sus les
Englois. Quant ilz furent bien pourveuz
de grans gens ainsi qu’il leur besoignoit,
ilz se partirent de la forest de Gedeours
et alerent par toute Escoce reconquerre
des forteresces celles qu’ilz porent n’avoir
et passerent oultre la bonne cité de Bervich
et la riviere de Thin et entrerent ou paÿs
de Northombrelande, qui jadis fu royau
me. La trouverent ilz bestes grasses a
grant foison, si gasterent tout le paÿs et
ardirent jusques a la cité de Dureme
et asséz oultre. Puis s’en retournerent
par un autre chemin gastant et ardant
le paÿs si qu’ilz destruisierent bien en celle
chevauciee III journees loings du paÿs
le roy englois. Et puis rentrerent ou paÿs
d’Escoce et reconquistrent toutes les for
teresces que le roy englois y tenoit hors
miz la bonne cité de Bervich et III autres
fors chastiaux qui leur faisoient trop
grant ennuy et souvent pour les vail
lans gens qui les gardoient et le paÿs
d’entour aussi. Et estoient et sont encore
ces III chasteaux si fors que a paines
pourroit on trouver nulz si fors en nul
paÿs. Si appelle on l’un Strumelin, l’autre
Rosebourc, et le tiers et le souverain d’Escoce,

Haindebourc, lequel siet sur une haute
roche par quoy on voit tout le paÿs d’en
viron et est la montaigne si droite que
a paine y pouoit un homme monter sans
reposer II fois ou III et ainsi un cheval
a demie charge. Et estoit cil adont qui
faisoit plus de contraires a ces seigneurs
d’Escoce et a leurs gens. Et en estoit chastelains
et garde pour le temps de lors un vaillant
chevalier englois qui s’appelloit messire
Gautier de Limozin, frere germain a monseigneur
Richart de Limozin qui si vaillaument
tint et defendy Thun l’Evesque contre
les François.
Or avint en ce temps que le siege
se tenoit devant Tournay et que
ces seigneurs d’Escoce comme dessus est dit,
chevauçoient parmy le paÿs d’Escoce recon
querans les forteresces a leur loyal pouoir,
messire Guillaume de Douglas s’avisa d’un grant
fait et perilleux et d’une grant subtileté
et le descouvri a aucuns de ses compaignons,
au conte Patris, a monseigneur Simon Fresiel,
qui estoit lieutenan du roy David d’Escoce
et a Alixandre de Ramesay qui tous si
accorderent et se mistrent en celle peril
leuse aventure avec le bon chevalier dessus
dit et prindrent bien CC compaignons
de ces Escos sauvages pour faire une
embusche ainsi comme vous orréz. Ces
IIII seigneurs et gouverneurs de tous
les Escos qui savoient le peuple l’un de
l’autre entrerent en mer a toute leur
compaignie et firent pourveance d’avoine,
de blance farine et de charbon et de
foing puis arrivierent paisiblement a
un port qui estoit a III lieues pres de ce
fort chastel de Haindebourc qui leur
destraingnoit plus que tous les autres.
Quant ilz furent arrivéz ilz yssirent
hors par nuit et pristrent X ou XII com
paignons esquelx ilz avoient plus grant
fiance et se vestirent de poures cottes
descirees et de povres chappeaux a guise
de povres marchans et chargierent XII
petiz chevalez de XII sacs. Les uns empliz
d’avoine, les autres de farine et les autres
de charbon et de foings. Et envoierent
leurs compaignons embuschier en une pb 48 r

Display By:	Folio Manuscript Chapter SHF Chapter

Manuscript:
Navigate By:	Folios Manuscript Chapters Edition Chapters Printed Editions
Go To:

Return to Manuscript

Facsimile	Manuscripts are displayed with a layout and visual style which reflects the original manuscript as closely as possible.
Edition	Manuscripts are displayed in a more readable style resembling a modern edition.
Synchronise by word	Every collated word becomes a link. Clicking on a word will synchronise all open manuscripts to that word.
DMF	With this setting, every word becomes a link to the online Dictionnaire du Moyen Français (DMF). Clicking on a word opens a window listing relevant entries on the DMF website.

Horizontal	Viewing windows extend horizontally across the page.
Vertical	Viewing windows extend vertically down the page.