par une espie que le bon chevalier messire
Garnier de Cliçon estoit trespassé des plaies
et des bleceures qu’il avoit receues en lui
defendant si comme voir estoit, dont ce fu
dommage et pitié. Si commanda tantost
qui chascun s’alast armer pour recommencier
l’assaut et ilz le firent moult viguereusement.
Et dont fist le conte traire avant aucuns
instrumens qui fais estoient de grans
merriens pour getter oultre les fosséz pour
venir aux murs du chastel. Ceulx dedens
se defendirent durement de traire et
de getter pierre et feu et pos plains de
chaus jusques environ heure de midy.
Adont leur fist requerre le conte qu’ilz se
voulsissent rendre et lui tenir a seigneur
et il leur pardonroit son mautalent
ilz eurent sur ce conseil longuement
et tant que le conte fist cesser l’assault.
Au derrain quant ilz se furent longue
ment conseilliés, ilz se rendirent de plain
accort au dit conte sauves leurs corps leurs
membres et leur avoir. Si entra lors
le dit conte ou chastel de Brest a pou de
gens et reçut la feauté de tous les hommes
de la chastelerie et y establi un chevalier
pour cappitaine en qui moult se fioit
puis revint a ses tentes tout joyeux.
SHF 1-141 sync Aprés eut le conte conseil qu’il se
trairoit pardevers la cité Resnes,
qui estoit asséz pres du chastel de Brest.
Si fist deslogier ses gens et traire celle
part. Et par tout ou il venoit il faisoit
toutes manieres de gens rendre et
faire feauté a lui comme a leur droit
seigneur et emmenoit tous les aidables
avec lui pour efforcier son ost. Et ilz ne
l’oserent refuser pour doubtance de
leurs corps. Et ainsi ala tant qu’il vint
devant la cité de Resnes si fist ses gens
logier entour la ville et entour les fourbours.
Quant ceulx de la cité virent ce, ilz
firent grant semblant d’eulx defendre
et avoient avec eulx un gentil chevalier
preux et hardy qui demouroit asséz
pres de la et l’amoient durement pour
sa loyauté et l’avoient esleu a gouver
neur et avoit nom messire Henry de