avec eulx. Il s’en y tray tant de ceulz qui
estoient de leur accort et du lignaige qu’ilz
furent bien IIM tous d’un accort. Quant
les autres communs virent ce ilz se com
mencierent durement a esmouvoir et a
crier sur les bourgois disans sur
eulx pluseurs laides paroles et vilaines et
au derrain leur coururent sus et en tuerent
grant foison. Et dont les bourgois s’acor
derent a la paix lors cessa le hustin et
couru le commun ouvrir les portes et
rendirent la cité au dit conte et lui
firent hommage grans et petiz et le
congneurent a seigneur. Aussi fist mesire
Henry de Pennefort et fu retenu de son
conseil. SHF 1-142 sync La prise du chastel Haimbont.
Adont entra le conte de Monfort
en la cité de Resnes a grant feste
et fist son ost tout quoy logier aux champs.
Et fist la paix et l’accort entre les grans
bourgois et le commun, puis establi bail
lifs, prevostz, eschevins, sergens et tous
autres officiers. Et sejourna en la cité
III jours pour lui reposer et tout son
ost aussi et pour avoir avis qu’il feroit.
Au quart jour fist son ost deslogier et
eut conseil de traire vers un des plus
fors chasteaux et forte ville sans compa
roison de toute Bretaigne que l’en claime
Haimbont et siet sur un bon port de mer
et en va le fleuve tout autour par grans
fosséz. Quant messire Henry de Pennefort
vit ce il ot paour qu’il ne mescheist a
messire Olivier de Pennefort son frere qui
avoit longuement esté et estoit cappitaine
de Haimbont si trait le conte d’une
part et lui dist : "Sire, je sui de vostre
conseil si vous doy feauté. Je voy que
vous vouléz traire devers Haimbont.
Sachiés que le chastel et la ville sont si
fors qu’ilz ne sont mie a gaingnier si
comme vous pouéz penser. Vous y pourréz
seoir et perdre le temps d’un an ainçois
que vous le puissies prendre par force.
Mais je vous diray se vous me vouléz
croire comment vous le pourréz avoir. Il
fait bon ouvrer par engin quant on
ne puet avant aler par force. Vous me
bailleréz s’il vous plaist jusques a VIC