de grant avoir qu’ilz avoient gaingnié
a Durem. Quant le bacheler messire
Guillaume de Montagu vit qu’ilz estoient
tous passéz et qu’ilz n’arrestoient point
au chastel, il yssi hors tout armé atout
XL hommes d’armes et suivi couverte
ment aprés le derrain trahin qui avoient
chevaux si chargiés d’avoir que a grant
mesaise pouoient ilz aler avant. Si les
raconsuivi a l’entree d’un boys et leur
coururent sus si en tuerent et blecierent
lui et ses compaignons plus de CC et
pristrent bien VIXX chevaux chargiés de
joyaux et d’avoir et les amenerent par
devers le chastel. Le cry et les fuians s’en
vindrent jusques a monseigneur Guillaume
de Douglas qui faisoit l’arrieregarde
et avoit ja passé le boys, et aprés en
vindrent les nouvelles en l’ost. Qui dont
veist les Escos retourner a cours de cheval
parmy les champs par montaignes et
par valees monseigneur Guillaume de Douglas tout
devant, il en peust avoir hideur. Tant
coururent qui mieux mieux qu’ilz vin
drent au pié du chastel et monterent
la montaigne en grant haste. Mais
ainçois qu’ilz parvenissent aux bailles
ceulx de dedens les avoient refermees
et la proie et l’avoir miz leans a sauveté
de quoy les Escos eurent grant dueil si
commencierent a assaillir moult forment
et ceulx dedens a defendre de lancier et
d’estechier de traire et de getter tant que
on pouoit d’une part et d’autre. La s’effor
cierent durement les II Guilleaumes de grever
l’un l’autre et tant dura cel assaut que
tout l’ost des Escos y fu venu et le roy
aussi. Quant le roy et son conseil eurent
veü les gens mors gisans sus les champs
et virent les assaillans blecier et navrer
a cel assaut sans riens conquester, ilz en
furent durement courrouciés si commanda
le roy que on laissast l’assaillir et que
chascun s’alast logier. Car il ne trairoit plus
avant si aroit veü ses gens vengier.
Qui adont veist gens fremir et appareillier
l’un l’autre et querre piece de terre pour mieux pb 61 v