Online Froissart
Home  |  Navigate  |  Apparatus  |  Search  |  About the Edition  |  About the Project  |  Help
Facsimile mode    Settings    Browse  |  Collate      
Navigate | Close
Preferences
New York M804
Previous | Folio 74 r | Next
pb 74 r

du bourc et puis les portes de la cité. S’y
entrerent ens par force et par prouesce
voulsissent ou non les Englois qui furent
miz en chace et en y eut moult de mors
et de navréz et meismement messire Robert
d’Artois y fu durement navréz et a grant
meschief fu il sauve et garde d’estre pris
et se party par une posterne derriere et
monseigneur de Stanfort avec lui si chevaucierent
devers Haimbont. Et la furent pris et
fianciés prisonniers messire Hervi de Leon,
le sire Despensier d’Engleterre filz a monseigneur
Huon le Despensier dont ce livre fait
mention ou commencement mais il fu
tant bleciés a cel assaut qu’il ne vesqui
depuis que III jours. A Haimbont
demoura messire Robert d’Artois un petit
de temps bleciés et navréz. En la fin il
fu conseillié pour le mieux mediciner
et garir qu’il s’en repairast en Engleterre,
car la trouveroit il surgiens et
medicins a voulenté. Si crut conseil
dont il fist folie car au retourner en
Engleterre il fu durement grevéz et
appresséz sur la marine et s’esmeurent
de ce tellement ses plaies que quant
il fu venuz et apportéz a Londres il ne
vesqui mie longuement depuis. Ains
mouru de celle maladie dont ce fu
dommage, car il estoit courtois chevalier
preux et hardy et du plus noble sang
du monde. Si fu enseveliz a Saint Pol
a Londres28 et lui fist le roy englois faire
son obseque aussi solempnelment comme
se ce eust esté pour son cousin germain
le conte d’Erbi. Et fu le dit messire Robert
durement plaint du roy, de madame la
royne, des seigneurs et des dames d’Engleterre.
Comment le roy d’Engleterre ostoia la
premiere fois en la duchié de Bretaigne.
Si tost que messire Robert d’Artois fu
trespassé de ce siecle et que le roy
englois en sceut les nouvelles, il en fu
si courrouciés qu’il jura et dist oyans
tous ceulx qui oir le peurent que jamais
n’entenderoit a autre chose si aroit vengié
la mort de lui et yroit meismes en Bre
taigne et atourneroit tel le paÿs que
dedens XL ans, aprés il ne seroit point

recouvré. Si fist le roy englois tantost
escripre lettres et mander par tout son
royaume que chascun noble et nonnoble
fust appareillié pour mouvoir et venir
avec lui au chief du mois. Et fist faire
tantost grant amas de nefs et vaisseaux
et bien pourveoir et estoffer de ce qu’il appar
tenoit. Au chief du mois il se mist en mer
a grant navie et vint prendre port asséz
pres de Vannes la ou messire Robert d’Artois
et sa compaignie arriverent quant ilz
vindrent en Bretaigne. Si descendirent
a terre et mistrent III jours a mettre
hors leurs chevaux et leurs pourveances.
Au quart jour ilz chevaucierent pardevers
Vennes. Et toudiz se tenoit le siege du
conte de Salebrin et du conte de Pennebrot
et des Englois dessus dis devant Rennes.
SHF 1-193 sync Le roy Edouart assist la cité de Vennes
de toutes pars. A ce dont estoient dedens
messire Olivier de Cliçon, messire Hervi de
Lyon, le sire de Tournemine, monseigneur Gieu
froy de Malestret et messire Guy de Lohiac
lesquelx avoient bien suppose de long
temps que le roy englois venroit moult
efforciement en Bretaigne si comme il fist.
Pourquoy ilz avoient le chastel et la
cité de Vennes pourveu grossement
de toutes pourveances neccessaires et
aussi de bonnes gens d’armes pour defend
et bien leur besoingnoit. Car si tost que
l’ost du roy englois fu logié devant, ilz les
fist assaillir moult asprement et venir
les archiers pardevant et traire de
grant randon a ceulx de la cité et dura
cel assaut bien demy jour mais riens n’y
firent fors eulx lasser et traveillier tant
fu la cité bien defendue. Lors se retrairent
les Englois a leurs logeis. Si tost que
la contesse de Monfort sceut la venue du
roy englois, elle se party de Haimbont
bien acompaigniee de monseigneur Gautier de
Mauny et de pluseurs autres chevaliers
et escuiers et s’en vint devant Vennes
conjoir et festoier le roy d’Engleterre et les
barons de l’ost. Le roy recueilly la dame
moult liement et adont eut entr’eulx
la moult de paroles qui toutes ne pevent
mie estre escriptes. Et quant la contesse pb 74 v