paÿs de Bretaigne ses gens qui seoient de
vant la cité de Vennes y livroient tous
les jours maint assaut dont il avint
un jour le siege pendant que a l’une des
portes un grant assaut se fist. Et se trairent
de celle part toutes les bonnes gens d’ar
mes de l’un léz et de l’autre et la eut mainte
belle appertise d’armes faite. Car ceulx de
Vennes avoient comme bons chevaliers
et hardiz ouvert celle porte et se tenoient
a la barriere, pour ce qu’ilz veoient la ba
niere du conte de Warvich et ceste du conte
d’Arondel et du conte de Stanfort et de monseigneur
Gautier de Mauny qui s’abandonnoient,
ce leur sembloit asséz folement. De quoy messire
de Cliçon et messire Hervi de Leon et les autres
chevaliers plus courageusement se aven
turoient la eut fait tant de prouesces
que merveilles seroit du recorder. Car
les Englois qui veoient la porte ouverte
le tenoient en grant despit et les aucuns
le tenoient a grant vaillance. La eut lancié,
escarmuchié et estechié d’un léz et de l’autre
moult longuement. Finablement cel
assaut se porta tellement que de premiers
les Englois furent reboutéz et reculéz
moult arriere des barrieres. En ce qu’ilz
reculerent les chevaliers de Bretaigne
s’avancierent et ouvrirent leur baille
chascun son glaive en son poing et laissierent
VI chevaliers des leurs pour garder
la baille avec grant foison d’autres gens.
Puis tout a pié en lancant et escarmuchant
ilz poursuirent les chevaliers englois qui tout
en reculant se combatoient. La eut bon
poingneis et fortbouteis de glaives.
Touteffois Englois multiplierent et
fortefierent tellement qu’il couvint les
Bretons reculer et non pas si riuleement
qu’ilz estoient avaléz la eut grant
luite et grief encontre. Et remontoient
les chevaliers de Bretaigne, le sire de
Cliçon et messire Hervi de Leon a grant
malaise. Si y eut maint homme mort et
blecié. Quant ceulx qui gardoient la
barriere virent leurs gens reculer et
chacier, ilz retrairent leur barriere et
si mal a point qu’il couvint le seigneur
de Cliçon demourer dehors et fu pres devant
les bailles et aussi messire Hervi de Leon.