The Online Froissart

Facsimile mode Settings Browse | Collate

pb 77 v

lairay venir a raençon legiere et gracieuse
selon vostre estat. Pour l’amour de mon cousin
le conte d’Erbi qui m’en a prie mais que vous
vueilliés faire ce que je vous diray." Le chevalier
eut grant joye quant il entendy qu’il n’aroit
garde de mort. Si respondy en lui moult
humiliant : "Chier sire, je feray a mon pouoir
loyaument ce que vous me commanderéz." Lors
dist le roy : "Messire Hervi, je sçay bien que
vous estes un des plus riches chevaliers de
Bretaigne et que se je vous vouloie presser
bien paieriéz XXXM ou XLM escus. Je vous
diray que vous feréz vous yréz devers mon
adversaire Phelippe de Valois et lui diréz depar
moy que pour tant qu’il a miz a mort vil
laine si vaillans chevaliers et si gentilz
comme ceulx estoient de Bretaigne et de
Normandie, en mon despit je dy et vueil
porter oultre qu’il a enfraint les treves
que nous avions ensemble, si y renonce
de mon costé et le defie de ce jour en avant.
Et parmy tant que vous feréz ce message,
je vous laisseray passer sur XM escus que
vous paieréz ou envoieréz a Bruges dedens
V mois aprés ce que vous auréz repassé
la mer. Et encore diréz vous a tous chevaliers
et escuiers depar dela que pour ce ne laissent
mie a venir a nostre feste. Car nous les y
verrons moult voulentiers et aront
saufalant et saufvenant et XV jours
aprés la feste." "Monseigneur," ce dist lors messire Hervy,
"je fourniray vostre message a mon pouoir
et Dieux vous vueille mercier la courtoisie
que vous m’avéz faite et a monseigneur le conte
d’Erbi aussi." Depuis ceste ordonnance ne
demoura gueres le dit messire Hervi en
Engleterre mais eut congié et se parti du
roy et des barons et vint a Hantonne. La
entra il en un vaissel en mer et avoit enten
tion de arriver a Harefleu mais un torment
le prist et cueilla sur mer qui dura plus
de V jours et furent tous perduz les
chevaux de lui et de sa compaignie et
gettéz en mer. Et le dit messire Hervi
si tormenté qui onques puis il n’eut
santé. Touteffois a grant meschief au
XVe jour les mariniers prindrent terre
a Crotoy. Si vindrent tous a pié le dit
messire Hervi jusques a Abbeville et sa
compaignie. La se monterent ilz mais le dit

messire Hervi estoit si traveilliés qu’il ne pouoit
souffrir le chevaucier. Ains se mist en litiere
et vint a Paris devers le roy Phelippe et fist son
message bien et a point. Depuis, si comme je
oy recorder, ne vesqui mie longuement ains
mouru, en ralant en son paÿs en la cité d’Angiers,
Dieux en ait l’ame.
SHF 1-205 sync Or aproucha le jour de saint George qui
ceste feste devoit tenir ou chastel de
Windesore, et y fist le roy grant appareil.
Et y furent du royaume d’Engleterre contes,
barons et chevaliers, dames et damoiselles
et fu la feste moult grande et moult noble
bien festee et bien joustee et dura par le
terme de XV jours. Et y vindrent pluseurs
chevaliers de deça la mer, de Flandres,
de Hainau et de Braibant mais de France
n’en y eut nulz. La feste durant et seant
pluseurs nouvelles vindrent au roy
d’Engleterre de pluseurs paÿs et par especial
y vindrent chevaliers de Gascoingne, le sire de
Lespare, le sire de Chaumont et le sire de
Muchident, envoiéz depar les autres barons
et chevaliers qui pour le temps de lors se tenoient
pour Englois, telz comme le seigneur de
Labeet, le seigneur de Pumiers, le seigneur
de Montferrant, le seigneur de Landuras,
le seigneur de Courturon, le seigneur de
Longueren, le seigneur de Grailli et pluseurs
autres tout en l’obeissance du roy d’Engleterre.
et aussi depar la cité de Bordeaux et celle
de Bayonne. Si furent les dis messages
moult bien venuz, bien recueilliz et
conjoiz du roy d’Engleterre et de son
conseil. Si remoustrerent les dessus dis
au roy comment petitement et foiblement
son bon paÿs de Gascoingne et ses bons
amis et sa bonne cité de Bordeaux estoient
confortéz et secouruz. Si lui prioient les
dessus dis qu’il y voulsist envoier un tel
cappitaine et tant de bonnes gens d’armes
avec lui qu’ilz fussent fors et puissans de
resister a l’encontre les François qui tenoient
les champs avec ceulx qu’ilz trouvoient
ou bon paÿs. Le roy repondi liement et
dist que aussi feroit il. Asséz tost aprés
ordonna le dit roy sur ces choses.
Ci commencient les fais du conte d’Erbi ou
paÿs de Gascoingne. pb 78 r

Display By:	Folio Manuscript Chapter SHF Chapter

Manuscript:
Navigate By:	Folios Manuscript Chapters Edition Chapters Printed Editions
Go To:

Return to Manuscript

Facsimile	Manuscripts are displayed with a layout and visual style which reflects the original manuscript as closely as possible.
Edition	Manuscripts are displayed in a more readable style resembling a modern edition.
Synchronise by word	Every collated word becomes a link. Clicking on a word will synchronise all open manuscripts to that word.
DMF	With this setting, every word becomes a link to the online Dictionnaire du Moyen Français (DMF). Clicking on a word opens a window listing relevant entries on the DMF website.

Horizontal	Viewing windows extend horizontally across the page.
Vertical	Viewing windows extend vertically down the page.