Online Froissart
Home  |  Navigate  |  Apparatus  |  Search  |  About the Edition  |  About the Project  |  Help
Facsimile mode    Settings    Browse  |  Collate      
Navigate | Close
Preferences
New York M804
Previous | Folio 97 v | Next
pb 97 v

pouoient riens conquester, ilz s’en partirent
mais ilz ardirent tous les forbours
rez a rez des portes. Puis vindrent au
soir la ou le roy logié estoit. L’endemain
le roy et tout son ost se deslogierent et
chevaucierent parmy le paÿs ardant
et exillant devant eulx. Et s’en vindrent
logier en I gros village qu’on appelle
Grantviller. L’endemain le roy se desloga
et vint passant pardevant Argies. Si ne
trouverent les coureurs nullui qui gardast
le chastel, si l’assaillirent et prindrent
a pou de fait et l’ardirent. Puis passerent
oultre ardant et exillant tout le paÿs
d’environ. Et vindrent ainsi jusques au
chastel de Pois, la ou ilz trouverent bonne
ville et II chasteaux mais nul des sei
gneurs n’y estoit mais II belles damoi
selles, filles au seigneur de Pois, qui tantost
eussent esté violees, se n’eussent esté deux
chevaliers gentilz d’Engleterre, qui les garderent
et menerent au roy pour elles garder.
Ce furent messire Jehan Chandos et
le sire de Basset. Lequel roy pour honneur
et gentillesce leur fist bonne chiere et
liee et les recueilla doucement et leur
demanda ou elles vouldrent estre. Elles
respondirent : "A Corbie." La les fist le roy
mener et conduire sans peril. Celle
nuit se loga le roy en la dicte ville de Pois
et ses gens la ou environ ainsi qu’ilz
peurent. Celle nuit parlementerent les
bonshommes de Pois et ceulx des chas
teaux aux mareschaux pour eulz sauver
et non ardoir. Si se raençonnerent parmy
une somme de florins qu’ilz devoient paier
a l’endemain mais que le roy feust partiz.
Quant vint au matin le roy se desloga,
si se mist au chemin a tout son ost et de
mourerent aucuns depar les mares
chaux pour attendre cel argent que on
leur devoit delivrer. Quant ceulx de
la ville de Pois furent assembléz et ilz
virent que le roy et tout l’ost estoient
partiz et que ceulx demouréz derriere
n’estoient que un petit de gens, ilz refu
serent a paier et leur coururent suz
pour occire. Ces Englois se mistrent a
defense et envoierent querre secours

en l’ost. Ceulx qui chevaucierent aprés
l’ost exploitierent tant qu’ilz trouverent
l’arriegarde, dont messire Regnault
de Gobehen et messire Thomas de Hollande
estoient chievetaines, si retournerent
et estourmirent l’ost criant : "Trahy,
trahy!" Si vindrent vers Pois ceulx qui
les nouvelles entendirent et trouverent
encore leurs compaignons combatans
a ceulx de la ville. Lors furent ceulx de
la ville durement envahiz et presque
tous mors et la ville arse et les deux
chasteaux abatuz. Puis retournerent
arriere devers l’ost du roy, qui estoit
venuz a Araines et avoit commandé
toutes manieres de gens a logier et
que point ne passassent avant. Et
commanda sur le hart que nul ne
forfeist rien a la ville d’arsin ne
d’autre chose car il se vouloit la
tenir I jour ou II et avoir avis et
conseil par quel pas il pourroit la
riviere de Somme passer mieux a son
aise. Et bien lui besongnoit qu’il y
pensast si comme vous orréz.
SHF 1-266 sync Or vueil je retourner au roy
Phelippe de France, qui estoit a Saint
Denis et ses gens la environ et tousjours
lui croissoient gens et venoient de
tous costéz si en avoit tant comme sans
nombre. Si estoit le dit roy partiz
de Saint Denis a grant baronnie en
instance que de trouver le roy d’En
gleterre et combatre a lui car moult
en avoit grant desir pour contrevengier
l’arsin de son royaume et la grant
destruction que les Englois y avoient
fait. Si chevauça tant le dit roy
de France par ses journees qu’il vint
a Coppigni l’Esquisee, qui siet a III
lieues pres d’Amiens. La s’arresta
pour attendre ses gens qui venoient
de toutes et pour aprendre le cou
venant des Englois. Or parlerons
du roy d’Engleterre, qui estoit arrestéz a
Araines, si comme vous avéz oy, et
avoit bien attendu que le roy de
France le suioit. Et si ne savoit
encore la ou il pourroit passer la pb 98 r