Online Froissart
Home  |  Navigate  |  Apparatus  |  Search  |  About the Edition  |  About the Project  |  Help
Facsimile mode    Settings    Browse  |  Collate      
Navigate | Close
Preferences
New York M804
Previous | Folio 99 r | Next
pb 99 r

chevaucierent sur le conduit de ce vallet,
qui les menoit, et si bien exploitierent
qu’ilz vindrent environ souleil levant
a ce gué que on claime la Blanchetaque
mais le fleuve de la mer estoit adont tout
plain, si ne peurent encore passer. Aussi
bien couvenoit il au roy attendre ses
gens qui venoient aprés lui. Si demoura
ylec jusques aprés prime que le fleuve
s’en feust raléz. Et ainçois que le flun
en feust raléz, messire Godemar du Fay
vint d’autrepart la riviere depar le roy
de France, a bien XIIM hommes que uns
que autres, qui tantost se rengierent
sur le pas de la riviere pour le garder
et defendre. Mais le roy d’Engleterre commanda
a ses mareschaux tantost ferir en l’eaue
et ses archiers traire forment aux Fran
çois qui estoient en l’eaue et sur le rivage.
Lors firent les II mareschaux d’Engleterre
chevaucier leurs banieres ou nom de
Dieu et de saint George et eulx aprés, si
se ferirent en l’eaue a plain eslais les
plus bachelereux et les mieux montéz
devant. La eut en la meisme riviere
faite mainte jouste et maint homme
reversé d’une part et d’autre. La commença
un fort hustin car messire Godemar et
les siens defendoient vaillemment le
passage. La eut aucuns chevaliers et
escuiers françois d’Artoit, de Picardie et
de la charge monseigneur Godemar, qui pour
leur honneur avancier se mettoient ou
dit gue et ne vouloient pas estre trou
véz sur les champs mais avoient plus
chier a jouster en l’eaue que sur terre.
Si y eut, je vous dy bien, la fait mainte
belle jouste et appertise d’armes. Et
eurent la envoiéz pour garder et def
fendre le passage gens d’eslite, qui se
tenoient tous bien rengiés sur le destroit
du passage de la riviere, dont les Englois
estoient durs rencontréz quant ilz
venoient a l’issue de l’eaue pour prendre
terre. Et y avoit Genevois, qui du
trait leur faisoient moult de mauls
mais les archiers d’Engleterre traioient
moult onniement. Et toudis ende
mentiers qu’ilz ensonnoient les François

gens d’armes passoient. Et sachiés que
les Englois se prenoient bien pres d’eulz
combatre car il leur estoit dit notoirement
que le roy de France les poursuivoit a
plus de CM hommes. Et ja estoient aucuns
compaignons coureurs de la partie des
François venuz jusques aux Englois les
quelx en rapporterent vrayes enseignes
au roy de France si comme vous orréz.
SHF 1-270 sync
Miniature

Sur le pas de la Blanche
taque fu la bataille dure
et forte. Et asséz bien gardee
et defendue des François.
Et maintes belles appertises
d’armes y eut faites ce jour d’une partie
et d’autre mais finablement les Englois
passerent oultre a quelque meschief et
se trairent ainsi qu’ilz passoient tous
sur les champs. Si passa le roy et le
prince de Galles son filz et tous les
seigneurs. Depuis ne tindrent les Fran
çois gueires de conroy et se party qui
peut d’icellui passage tout desconfit.
Quant messire Godemar vit le meschief,
il se sauva au mieulx qu’il peut. Aussi
firent pluseurs de sa route et prindrent
aucuns le chemin d’Abbeville et les
autres cellui de Saint Riquier. La eut
grant occision et maint homme mort
car ceulx qui estoient a pié ne pouoient
fuir si en y eut grant plenté de ceulx
d’Abbeville, de Monstruel, de Rue et de
Saint Riquier mort et pris et dura la
chace plus d’une grosse lieue. Encores pb 99 v