pb 23 rhonnourable et le mirent ens, puis le commanderent
a
deux freres meneurs du corps
conduyre. Et ainsi envoierent le
corps a
ses deux freres qui le receurent a grant valleur.
Et le firent
ensevelir et enterrer aux
Cordelliers a Vallenciennes.
¶ Aprés s’en vindrent
les
deux freres de Many
logier au
chastel de Thim l’Evesque, ou
leur frere avoit
esté mort comme dit est. Et firent
a
ceulx de Cambroy moult forte guerre pour contrevangier
la mort de
leur
frere.
SHF 1-93 sync
Comment le roy de France, Philippe,
fist courir la terre au conte de Haynault.
Vous devés savoir que pour le temps estoit
messire Godemar du Fay
pour le
roy de France
Phlippe, tout cappitaine de la
cité de Tournay et
du
paÿs de Tournezis, et des
forteresses d’illeuc. Et aussi estoit lors le
sire de
Biaugeu dedens
Mortaingne
sur l’Escaut, le senechal de
Carquassonne en la
ville de Saint Amand, messire Haymart
de Poitiers a
Douay,
messire le Galloiz de Baume, le sire de Villers, le mareschal de
Mirrepois, le sire de Moruel en la
cité de Cambroy. Et ne desiroient tous ces chevaliers et
souldoyers aultre fors qu’ilz peussent courir
en
Henau pour pillier et pour le païs
mettre en guerre. Et aussi
messire
Guillaume d’Aussonne, evesque de Cambroy, y mettoit
moult grant painne, le quel
estoit a
Paris et se complaingnoit moult amerement
des
Henuiers qu’ilz luy avoient fait plus de dommaige en pilleries et en arseures que nulles
gens.
Si se porterent adoncques les besoingnes que le
roy fut conseillé de courir
son
propre
nepveu, le conte de Henau, tant que les souldoyers de
Cambrezis oulrent congié d’entrer
en
Haynau. Et y faire aucunne chevauchees
ou dommage du paÿs.
¶ Quant ces nouvelles
vindrent a ceulx qui es garnisons de
Cambrezis estoient, ilz en furent moult joyeux.
Et mistrent jus une chevauchee a V
C armeures de fer. Et se partirent a ung samedi
au
jour faillant ceulx qui ad ce ordonnés estoient. Et avec eulx de
la Mallemaison
qui tous se trouverent sur les champs, et vindrent a la
ville de Haspres qui lors
estoit
une bonne ville et grosse et bien fossee. Mais n’estoit fermee. Et si n’estoient les
gens en nulle doubte, car ilz n’avoient paour de nulles guerres. Si entrerent dedens.
Et
trouverent les gens hommes et femmes en leurs hostelz. Et les prindrent a leur
volenté
avecques tout l’or et argent, draps et joyaulx. Et puis boutterent le feu en
la
ville,
et l’ardirent si nettement que riens n’y demoura fors les paroiz par dedens.
¶ A
Haspres a une priouré de noirs moingnes de
Saint Vaast d’Arras, laquelle ilz
pillerent aussi et puis boutterent le feu dedens, et
l’ardirent moult villainement.
¶ Quant ilz oulrent faitte leur volenté, ilz chargierent tout le pillaige
et puis chasserent tout devant eulx, puis s’en retournerent a
Cambroy.
¶ Ces
nouvelles furent tost semees a
Valenchiennes, et
meismement au
conte qui se dormoit
a son lit en
son hostel que on dit la Salle. Si se leva moult appertement. Et fist tost
resveiller touttes ses gens dont il n’avoit
mye grant foison devers ly fors seullement
son seneschal, messire Girard de Berthin,
messire
Henry d’Antoing,
messire Tyerry de
Vallecourt et le sires de Poutelies et aucuns aultrez qui se tenoient deléz ly, ainsi que
tous gentilzhommes se tiennent
volentiers deléz leurs seigneurs. Mais ilz estoient couchés
en leurs hostieulx. Si ne furent mye
si tost levéz ne appareillés comme le
conte fut qui ne
attendi nully, ains s’en vint
au
marchié de Vallenchiennes. Et fist sonner les cloches
au beffroy a la vollee. Si
s’atournerent touttes gens et arriverent, puis suifvirent
leur
seigneur qui s’enffuioit
a effors aprés les ennemys a pou de gens. Et grant volenté avoit de les
combatre, s’il les eust
peu trouver. Mais ains qu’il eust chevauchié une lyeue nouvelles
pb 23 v