pb 29 r
Heresuain, Denain, Montegny, Varlain, Vargny, Aubrecicourt, Louich, Sauc, Neufeulle et
le Lieu Sire Simault, et tous les villages qui en ce païz estoient. Si qu’ilz ramenerent
grant pillage en leurs garnisons. Et quant ceulx de Douay furent retraiz, ceulx
souldoyers de Bouhain yssirent hors et ardirent l’autre partie d’Ascons qui se tenoit
franchoise et en tous les villages françoiz jusques ens les portes de Douay, et la
ville d’Esquerthin ainsi comme je vous ay devisé. ¶ Les garnisons sus les frontieres estoient
pourveües de gens d’armez si que souvent y avoit des chevauchiees et des rencontrez les
ungs sur les aultrez ainsi comme a telle besoingne appartient. Si advint a celle meismes
saison que les souldoyers allemans qui se tenoient depar l’evesque de Cambroy a la
Malle Maison a deux lyeues de Cambrezis et marchissoit d’autre part vers Landrechies
dont le sire de Pouchelles, ung appert cappitainne chevalier, estoit. Car le conte de Bloiz qui en fust seigneur
l’avoit rendu au conte de Henau pour tant qu’il estoit françoiz, et le conte le tenoit de sa main
et le faisoit garder par les Françoiz. Si avoient souvent huttin ceulx de la Malle Maison
et ceulx de Landrechiez. Dont ung jour saillirent de la Malle Maison les dessus diz Allemans
bien montés. Si vindrent courir devant la ville de Landrechiez contre les Henuiers qui la
se tenoyent dont s’armerent le sire de Pouchelles et tous ses compaingnons. Si monterent a
cheval pour rescourre la proye que les Allemans enmenoient. ¶ Or estoit adoncques le
sire de Pouchelles tout devant et le suifvoient ses gens chascun qui mieulx pouoit. De grant
volenté abaissa son glayve et escrya aux Françoiz qu’ilz retournassent. Et que grant
honte estoit de fouir. La avoit ung escuier allemant, appellé Allebret de Couloingne,
appert homme d’armes, le quel fut tout honteux quant il se vit ainsi chassé, si retourna
franchement et abaissa son glayve et fery cheval des esperons et s’adrecha sur le sire
de Pouchelles, et le chevalier sur luy tellement qu’il fery sur la targe ung si grant horion que
le glayve volla en pieches. Mais vaillanment le consuy de son glayve royde enfumé que
point ne brisa tant qu’il lui percha la targe, les plates et l’auqueton, et luy entra dedens
le corps et le poingny droit au cuer si qu’il l’abati jus de son cheval tout mort. Dont
vindrent ses compaingnons et ses gens qui s’arresterent sur luy. Et quant ilz le virent
en ce parti ilz le regretterent durement. Puis assaillirent les Françoiz moult durement
et asprement en contrevangant le sire de Poucelles qui mort estoit. Et si durement les
assaillirent que Allebret et sa routte furent desconfiz et pou en eschapa et fut la proie
rescousse et ramenee a Landrechiez. Mais le sire de Poucellez fut rapporté mort dont
tous les compaingnons furent moult courouchés.
SHF 1-107 sync Des dommaiges que faisoient ceulx de Haynau et de Cabrezis les ungs sus les aultres.
Aprés la mort au sire de Poucelles, le sire de Floyon fut ung tresgrant temps gardien
de la ville de Landrechiez et couroit souvent sus ceulx de Bouhain, de Malle
Maison et du Chastel en Cambrezis et des forteresses voisines qui ennemies leur
estoient. ¶ Ainsi couroyent ung jour les Henuiers les aultrez jours les Françoiz, si avoient
souvent des encontres et de ruéz jus des ungs et des aultrez. Si estoit le païs de Henau
en grant tribulacion car une partie de leur païs estoit toutte arse. Et si sentoyent encore
le duc de Normendie estre sus les frontieres, et si ne savoient qu’ilz avoient empensé, et
si n’avoient nulles nouvelles de leur seigneur le conte de Henau. ¶ Bien est voir qu’il avoit
esté en Angleterre, ou le roy et les Angloiz l’avoient festié bien et grandement. Et avoit la
faittes grandes aliances. Et puis s’estoit parti de la et allé en Allemaingne devers l’emperiere
Louys de Baviere, c’estoit la cause pourquoy il sejournoit tant. D’autrepart messire Jehan
de Henau estoit allé en Brebant et en Flandres et avoit monstré au duc de Brebant et pb 29 v