pb 30 v
quant ilz furent a Arquez ilz trouverent ceulx de Bergues qui se logoient. Ce temps
pendant qu’ilz se logoient vindrent les archiers courre jusques a la porte et portent
une baniere des armez messire Robert d’Artoiz. Et tyrerent si dru vers la porte que ce
estoit merveilles. Et quant ceulx de la porte virent ce, eulx yssirent hors tout a ung
coup et coururent a eulx, maiz ilz ne les attendirent mye ains s’enfouirent. Mais ceus
de Saint Osmer les chasserent jusquez a la malladerie, et ainsi palletot on moult souvent.
Mais oncques le duc ne homme d’armes ne se nuit. Et furent logiés les Flamencs qui
boutterent le feu a la ville d’Arques et l’ardirent toutte. ¶ Celle journee vint le conte
d’Arminacg a tout son ost en la ville. Et le roy de France, qui avoit fait assembler son
ost pour aller a Tournay, pensa qu’il vauldroit mieulx combatre a messire Robert d’Artoiz
que d’aller a Tournay, si fist aller a Saint Osmer. Les Flamencs qui estoient dessus Arquez,
alloient chascun jour palleter jusques aux faulxbourgs de Saint Osmer. Et faisoient
par nuit si grant lumiere en leur ost qu’il resplendissoit jusques a la ville, et faisoient
chascun jour moult grant assault a ung petit chastel qui estoit au duc de Bourgoingne
appellé Rubaut. Mais ilz ne le peurent gaingner. ¶ Quant messire Robert d’Artoiz si
sceust que le roy venoit sur ly, si hasta moult sa besoingne. Et par ung mercredi le
matin manda tous les cappitainnes de sont ost. Et leur dit : "Seigneurs j’ay ouy nouvelles que tost
je voyse vers Saint Osmer, et que tantost elle me sera rendue." Tantost s’en coururent
armer disans l’un a l’autre : "Or tost compaingnons. Nous verrons encore nuit que nous
berons de ces bons vins de Saint Osmer." Et ordonnerent deux batailles moult estoffeement.
¶ Quant les seigneurs et chevaliers de Saint Osmer virent les Flamencs rengiéz au long des
faulxbourgs, ilz yssirent hors par routtes sans arroy. Et estoient ja yssues touttes
les banieres excepté le duc de Bourgoingne et le conte d’Arminacg, qui ne sailloient
point, pour ce que le roy leur avoit mandé qu’ilz ne se combatissent point sans luy,
au dit messire robert, les diz chevaliers de Saint Osmer yssus firent plusieurs courses sus les
Flamencs sans les entamer. Et durerent depuis midy jusquez a compline ou environ.
¶ Quant le duc vit que ses ennemis estoient si prez de lui, si appella le conte de
Arminacg et ses conseilliers et leur dit : "Je ne voys pas que je ne soye au jour d’uy tres
deshonnouré, ou qu’il ne conviengne que je desobeisse au roy. Que me louéz vous seigneurs
a l’ayde de Dieu et de vos bons amis, a la paix du roy vendrés vous bien, combatés les !"
Tantost le dit duc dist : "Or nous en allons armer depar Dieu et depar monseigneur Saint
George." Si s’arma. Et yssirent hors de la ville plus de L hommes d’armez avecques
lui et s’en alla droyt a la malladerie. Et la trouva a l’encontre de lui la bataille
de messire Robert d’Artoiz. Aprés yssy le conte d’Arminacg, qui avoit bien VIIIC hommes
d’armez. Et se trayrent vers costé destre, ou ceulx d’Yppre estoient. ¶ Quant les
Bourgueignons virent le duc aux champs, si se trayrent vers ly, maiz les Artisiens
et les Flamencs de la partie du roy de France se tindrent tous coys en la campaingne.
¶ Adoncques vindrent les grans batailles de Bergues et de Furnes et du Franc
au travers des champs, et leur coururent sus. Et les Artisiens et les Flamencs
se deffendirent contre eulx. Mais quant ilz vindrent au fossé qui traversoit, si ne
pourent aller oultre, tantost retournerent les banierez. Et en retournant eust
maint homme hault seigneur desconfit, et s’en fuyoient de tous costés et laissoient leur seigneur
seul enmy les champs es mains des ennemis. Tantost que les Flamencs virent la
baniere retraire vers la ville, si saillirent oultre le fossé a grans routtez, et coururent pb 31 r